Аймақ басшысы алдымен Ә.Бөкейханов атындағы №1 гимназияға барды. Оқу ордасының негізгі ғимараты 1971 жылы пайдалануға берілген. Қазіргі таңда 2 600-ге жуық бала білім алуда. Білім ошағының жөндеуді қажет ететініне назар аударған аймақ басшысы жауаптыларға жұмыстарды ертерек бастап, оның сапасын барынша бақылауға алуды тапсырды.

Сондай-ақ Ербол Қарашөкеев 1979 жылы қолданысқа берілген №13 орта мектепті, Б.Момышұлы атындағы №45 гимназияның 1986 жылы тапсырылған 2 корпусын, 1975 жылы ашылған №25 орта мектепті аралап, жай-күйіне мұқият көңіл бөлді.

Облыс әкімі жауаптыларға білім беру нысандарын жаңғырту, күрделі жөндеу жұмыстарын бекітілген мерзімнен кешікпей сапалы жүргізу қажеттігін, құрылыс кезінде балалар қауіпсіздігіне жіті көңіл бөлу керектігін барынша ескертті. Сонымен қатар бюджет мүмкіншілігін ескере отырып, облыстағы тозығы жеткен білім ошақтарын өзектілігіне қарай кезең-кезеңімен жөндеуден өткізілетінін атап өтті.

***

Облыс әкімі Ербол Қарашөкеевтің Тараз қаласындағы білім беру нысандарының жағдайымен танысуы жалғасуда.

Аймақ басшысының кезекті жұмыс сапары №54 орта мектептен басталды. Аталған мектеп 2009 жылы пайдалануға берілген. Бүгінде 1 312 бала білім алуда.

Ербол Қарашөкеев оқу жылы аяқталған соң күрделі жөндеу жұмыстары басталатынын атап өтіп, Тараз қаласы әкіміне құрылыстың сапалы және мерзімінде жүргізілуін бақылауға алуды ескертті.

Бұдан соң Төле би атындағы №8 гимназияның бастауыш сыныптарға арналған ғимаратын аралап көрді. Тозығы жеткен әрі тар нысанның жағдайына назар аударған облыс әкімі жауапты тұлғаларға 1985 салынған білім беру ошағын кеңейту бойынша ұсыныстар әзірлеуді тапсырды.

Сондай-ақ өңір басшысы Абай даңғылында орналасқан №15 мектеп-гимназияда болып, мәселесіне көңіл бөлді.

Айта кетейік, облыста биыл 26 білім беру нысанының құрылысын жүргізуге қаржы қарастырылған. Оның ішінде 21 білім беру нысаны (11 мектеп, 10 мектепке қосымша ғимарат) биыл пайдалануға беріледі деп күтілуде. Нәтижесінде 1 апатты, 1 үш аусымды, 7 оқушы орны тапшылығы бар, 10 тозығы жеткен және 7 спортзал, асханасы жоқ мектептің мәселесін шешу жоспарлануда.

Бұдан бөлек, облыс аумағындағы 10 мектепті күрделі жөндеуге 7,3 миллиард теңге қаралып отыр.

Облыс әкімінің баспасөз қызметі