Наурызнама онкүндігі аясындағы 20 наурыз — халқымыздың рухани-мәдени құндылықтарының ажырамас бөлігі саналатын «Ұлттық спорт» күні. Бұл күннің басты мақсаты — ата-бабадан мирас болып қалған дәстүрлі спорт түрлерін дәріптеу, жастарға ұлттық рух пен батылдықты насихаттау, салауатты өмір салтын қалыптастыру.

Қазақ халқы ежелден күш пен ептілікті, шапшаңдық пен шыдамдылықты талап ететін көптеген спорт түрлерін дамытқан. Атап айтқанда, қазақ күресі, көкпар, теңге ілу, жамбы ату, аударыспақ, асық ату, тоғызқұмалақсекілді ұлттық ойындарымыз ұлттың намысы мен бірлігін көрсететін айрықша құндылықтар.

Бұл күні еліміздің әр өңірінде ұлттық спорт түрлерінен жарыстар ұйымдастырылып, спортшылар мен жастар өз өнерлерін көрсетеді. Сонымен қатар, ұлттық ойындар арқылы өскелең ұрпаққа салт-дәстүрімізді таныту, патриоттық рухты ояту мақсат етіледі.

Ұлттық спорт — халықтың рухани қазынасы. Сондықтан Наурыз мерекесінде ұлттық спортты ұлықтау – ұлттың ұлылығын, бірлігін, саламатты өмір салтын дәріптеудің көрінісі.