Бұл туралы жазушы-публицист Марат Байділдаұлы әлеуметтік желідегі парақшасында хабарлады.

"Кеше ғана: "Аға, "Қазақ салт-дәстүр, әдет-ғұрып этнографиясының методикалық энциклопедиясы" атты екі томдық кітабым шықты, соның тұсаукесеріне қатысып, лебіз білдірсеңіз" деп өтініш айтып еді. Қасиетті Рамазан айында дүниеден өткен адамға Жәннаттың есігі ашық болады деуші еді, Бөкеңді Алла алдынан жарылқасын!" – деп жазды ол.

Болат Бопайұлы 1960 жылы Қытайдың Көктоғай өңірінде дүниеге келген. Жоғары білім алып, Шыңжаң өлкесіндегі оқу-ағарту ісіне үлес қосты. Оның алғашқы шығармалары сол жақта жарық көрген. Кейін атамекенге оралған соң этнография саласына тереңдеп ден қойды.

Ғалымның артында қазақ этнографиясына байланысты "Қазақ мінезі", "Қазақ кәдесі", "Қазақы түс жору", "Бастаудан бақиға дейін", "Қазақтың гүл мәдениеті", "Қазақ наурызнамасы", "Қазақ аспан есебі" сынды оннан астам құнды еңбектері қалды.