– Мемлекеттің басым бағыттарының бірі – әлеуметтік осал топтағы отбасыларды баспанамен қамтамасыз ету. Халықты тұрғын үймен қамту саясаты ел Президенті Қасым-Жомарт Кемелұлы Тоқаевтың басты назарында, – деген Ербол Қарашөкеев қоныстой иелерінің шаңырағына шаттық, бақ-береке тілей отырып, пәтер кілттері мен тұрмыстық техниканың сертификатын табыстады.

Баспанаға 2012-2015 жылдары аралығында кезекке тұрған көпбалалы аналар, толық емес отбасылар, ІІ топ мүгедектері, жетім балалар мен ҰОС теңестірілген азаматтар қол жеткізді. Олардың қатарында көпбалалы ана Мөлдір Шадманова да бар.

– «Өз үйім – өлең төсегім» деп ата-бабамыз тегін айтпаған. Ұзақ жылдар бойы күткен пәтерімізге қол жеткізіп отырмыз. Осы орайда Мемлекет басшысына, игі іске атсалысқан азаматтарға отбасымның атынан алғыс білдіремін! Барша баспанаға мұқтаж отбасылар осындай бақыт бұйырсын! – дейді ол.

«Ұлы дала» ықшамауданында орналасқан №26 үйдің жалпы ауданы 9 600 шаршы метрді құрайды. 160 пәтерлі (2 бөлмелі) көпқабатты тұрғын үйдің құрылыс жұмыстарын «Aulet Stroy Taraz» ЖШС-сы жүргізген.

Ербол Қарашөкеев халықпен бірге үйлерді аралап, сапасын тексерді. Бұдан соң үйдің маңына 20 түп ағаш отырғызылды.

Айта кетейік, облыста биыл 765 мың шаршы метр тұрғын үй салу жоспарланған.

2025 жылы 2 390 пәтерлі 50 көпқабатты тұрғын үй пайдалануға беріледі (2024 жылы – 1 159 пәтерлі 26 көпқабатты тұрғын тұрғын үй).

Сонымен бірге тұрғын үй кезегінде тұрған халықтың әлеуметтік осал топтары үшін 4,9 миллиард теңгеге 361 пәтер сатып алынады.

Облыс әкімінің баспасөз қызметі