Ерлан Ділдәбекұлының айтуынша, 2025 жылдың қаңтар айының қорытындысы бойынша, қылмыстық атқару жүйесі департаментіне қарасты 5 мекемеде еңбекке жарамды 985 адам жұмыспен қамтылған.

– Бүгінгі күні мекемелердің өндіріс аумағында «Еңбек Тараз» республикалық мемлекеттік кәсіпорны филиалының бос тұрған өндірістік үй- жайлары мен ғимараттарды кіші және орта бизнес кәсіпкерлеріне сенімді басқаруға беріп, сотталғандар үшін қосымша жұмыс орындарын ашу бойынша жұмыстар жүргізілуде. Нәтижесінде 22 жеке кәсіпкер мекеменің ішкі аумағында, ал 3 жеке кәсіпкер қала ішінде өз жұмысын атқаруда. Мекеме аумағында жұмыс істеу орта және кіші бизнес өкілдері үшін тиімді. Себебі орынды жалға алу ақысы төленбейді, мекеме тарапынан жұмысшыларды жұмыс орындарында бақылау, 3 мезгіл тамақтандыру, кадрлық резерв дайындау секілді қызметтер кәсіпкерлерге қосымша көмек десек болады. Сонымен қатар жұмыс орындарында бейнебақылау камералары орнатылып, барлық іс-әрекеттері бақылауға алынған, – деді Ерлан Оразгелдиев.

Мәселен, «Теңізбаев» жеке кәсіпкерлігі №59 мекеме аумағынан былғарыдан аяқкиім тігу учаскесін ашып, жұмысын бастапты. Кәсіпкер №25 мекеменің өндіріс аумағына аяқкиім тігуге арналған ғимарат салып, 85 аяқкиім тігу машинасын алған. Сонымен қатар жеке кәсіпкер «Алматов» та аталған мекеменің өндіріс аумағында 2 қабаттан тұратын, 250 сотталған азаматты ақылы жұмыспен қамтитын тігін цехын ашуға ұсыныс білдіріпті. Қазіргі таңда жөндеу жұмыстарын жүргізуде.

– Сотталған азаматтарды еңбекпен қамтамасыз ету мақсатында техникалық және кәсіптік білім беру жұмыстары іске асырылуда. 2023-2024 оқу жылында қылмыстық атқару жүйесі мекемелері жанындағы №15 колледжде 5 мамандық бойынша 361 сотталған азамат білім алуда, – дейді Е.Ділдәбекұлы. 

Мұқағали БАЛТАБАЕВ