Мәдениет және ақпарат министрлігінің баспасөз қызметінің мәліметінше, қазақ өнерінің бұлбұлы Бибігүл Төлегенованы 95 жылдық мерейтойымен құттықтауға Алматы әкімі Ерболат Досаев арнайы келді. Ол салтанатты шара барысында Президент Қасым-Жомарт Тоқаевтың құттықтау хатын оқыды.

Мемлекет басшысы құттықтау хатында ұлттық мәдениеттің дамуына зор үлес қосқан Бибігүл Ахметқызының еңбегін ерекше атап өтті.

"Ұзақ жылғы жемісті шығармашылық жолыңыз Сізді абырой биігіне көтерді. Еліміздің алтын қорына мол мұра қалдырдыңыз. Өнегелі де өнерлі шәкірттер тәрбиелеп шығардыңыз. Ерен еңбегіңіздің жоғары мемлекеттік наградалармен, мәртебелі атақтармен және айрықша сыйлықтармен аталып өтуі – зор мерей," – делінген Президенттің құттықтауында.

Өз кезегінде Бибігүл Ахметқызы жылы лебіздер үшін алғыс айтып, барша қазақстандықтарды алда келе жатқан Тәуелсіздік күнімен құттықтады.

21 желтоқсан күні сағат 15:00-де Алматыдағы Республика Сарайында Бибігүл Төлегенованың 95 жылдық мерейтойына арналған салтанатты концерт өтеді. Концерт бағдарламасында әншінің шығармашылығынан шабыт алған, бүгінде өздері де жетекші жұлдызға айналған өнерпаздар классикалық және қазақ музыкасының жауһар туындыларын орындайды.

Айта кетейік, мерейтой аясында Қазақстан бойынша 150-ге жуық іс-шара ұйымдастырылды. Ел көлемінде концерттер, көрмелер, музыкалық кештер, дөңгелек үстелдер мен конференциялар өтті.

Бүгін қазақтың «қарлығаш көмей» әншісі, аңыз тұлға Бибігүл Төлегенова 95 жасқа толып отыр. Мерейтой қарсаңында өнер иесімен сұхбаттасудың да сәті түскен болатын.

Сонымен қатар әнші Димаш Құдайберген де әлеуметтік желідегі парақшасында қазақ өнерінің аңыз тұлғасы Бибігүл Төлегенованың 95 жылдық мерейтойына орай құттықтау жазбасын жариялады.

"Бүгін біз Қазақстанның рухани әлемінің символы, қазақ мәдениетінің нағыз аңызы – әйгілі Бибігүл Төлегенованың 95 жылдық мерейтойын атап өтудеміз. Бибігүл Ахметқызы – КСРО халық әртісі, Қазақ КСР халық әртісі, Социалистік Еңбек Ері. Ол бар ғұмырын өнерге арнап, 20-ғасырдың ірі опера әншілерінің біріне айналды. Оның бұлбұл үні тек Қазақстанның ғана емес, әлем жұртшылығының жүрегін жаулап алды. Бибігүл Ахметқызы жаңа буын өнерпаздарын тәрбиелеп, қазақ музыка мәдениетіне орасан зор үлес қосуда. Мен қазақ мәдениетінің бір өкілі ретінде осындай ұлы өнер иелері салған жолды жалғастыру мүмкіндігіне ие болғаныма мақтанамын. Әндеріңіз мәңгі шырқалсын! Туған күніңізбен!", – деп жазды Димаш.