Д.Сәттібаев 1987 жылы 5 наурызда дүниеге келген. Әл-Фараби атындағы Қазақ ұлттық университетінде «Қаржыгер» мамандығы бойынша бітірген. 2009-2011 жылдары М.Х.Дулати атындағы Тараз университетінде «Экономика» мамандығы бойынша білім алды. Экономика ғылымының магистрі атанды.

К.Г.Раумовский атындағы Мәскеу мемлекеттік технологиялар және менеджмент университетінде «Маркетинг» мамандығы бойынша біліктілігін арттырған.

Әр жылдары «Қазақстан Халық банкі» АҚ, «НұрБанк» АҚ, «ForteBank» АҚ Жамбыл облысы бойынша филиалдарында қызмет еткен.

Үлкен-кішіге ілтипаты ерен, ізеті ерекше Досхан Көсемәліұлы қаржы саласының білікті маманы әрі бірнеше тілде еркін сөйлейтін, білімді азамат болатын.

«Тас түскен жеріне ауыр» дейді халық даналығы. Мезгілінен бұрын жеткен ажалға қарсы тұрар шара бар ма?! Алланың үкімі осы болса, көнбеске амалымыз жоқ. Көркем мінез, көпшіл қасиетін өзгеге үлгі етіп кете барған Досхан Көсемәліұлының Алла алдынан жарылқасын! «Ажалдан жақын көрші жоқ» екенінің дәлеліндей болған қайғыға ортақтасып, Көсемәлі Сәттібайұлына, отбасына, туған туыстарына қайғыра көңіл айтамыз.

«Aulieata-Media»

жауапкершілігі шектеулі

серіктестігінің ұжымы