Соңғы жылдары елімізде, облысымызда оқушыларға робот техникасын үйрететін үйірмелер, орталықтар көптеп ашыла бастады. Талантты жастарды тәрбиелеп жүрген ісі оңды орталықтың бірі – «Али Robots». 

– Орталықтың ашылғанына 2 жылға таяу уақыт болды. Қанатымыздың астында 60-қа жуық тәрбиеленуші бар. Орталықта робототехника негіздерімен таныстырып, робот құрастыруға үйретеміз. Маусым сайын тақырып алып, тақырып аясындағы мәселелерді шешу мақсатында мамандармен жұмыс істейді.Біз балаларды түрлі жарыстарға дайындап, апарамыз. Шүкір,  қанжығамыз бос қайтқан кезі жоқ. Баланың орталыққа келгенінің өзі жетістік. Себебі 1 сабаққа қатысып та көп нәрсе үйреніп кетуге болады. Смартфонға көп қараған баланың ойлау қабілеті төмендейді. Бағдарлама жазу, робот құрастыру кезінде бала тереңірек ойлай алады. Яғни миға шабуыл жасайды. Дәл бұл дүние арқылы біз баланы қызықтыра аламыз. Өнертабысын құрастырғалы отырған тәрбиеленуші алгоритм жазады, логикасы дамиды. Сол кезден-ақ баланың нәтижесін көре аламыз. Ал жарыстағы жетістіктің орны мүлде бөлек, – дейді аға жаттықтырушы Әлихан Бақбергенұлы. 

Робот құрастырудың баланың денсаулығына да әсері мол. Ең тиімдісі жасөспірімде ұсақ маториканың дамуы жоғары болады, дербестік қалыптасып, бала ешкімнің көмегінсіз өз бетінше шешім қабылдай алады. Сонымен қатар есте сақтау қабілеті де дамып, ұқыптылыққа үйренеді.

Әлихан ұстаздың айтуынша, робот тілін түсіну керек және сол тілде бағдарлама құрып үйрену қажет. Ұстаздың ең кіші шәкірті 4 жасар Даниял Ернарұлы екен. Орталыққа келіп жүргеніне 3 ай болса да Даниял робот құрастыруды үйреніп алған. Баласының бұл жетістігіне ата-анасы да риза.

Ал Даниялдың әкесінің айтуынша, сабаққа барып жүрген уақыттан бастап баласының бойында өз бетінше жұмыс істеу және сөйлеу қабілеті жоғарылап, ширақ бола түскен. 

Кіл мықтыдан құрылған «SUPER MARIO» тобы қазіргі уақытта инновациялық жобалар дайындаумен айналысады. Жоғарыда айтқандай, балалар маусым сайын түрлі мәселелерге арналған арнайы тақырып алып, соған байланысты мамандардың ойын біліп, робот құрастырып шығарады. «SUPER MARIO» командасы бұл жұмысын таныстыру үшін кішігірім қалашық та жасаған екен.

Әлихан Бақбергенұлы мұнымен тоқтап қалмай, алғыр, дарынды шәкірттер тәрбиелеу бағытында тынбай еңбектене беретінін айтады. Болашақта шәкірттері ұстаздан озып, еліміздің атын көпке танытады деген сенімдеміз.

Назира ҒАЛЫМЖАНҚЫЗЫ, 
М.Х.Дулати атындағы 
Тараз өңірлік университетінің 
2-курс студенті