Соңғы жылдары елімізде энергетикалық инфрақұрылымның жұмыс істеуін жақсартуға, инвестициялық тартымдылықты арттыруға және цифрлық технологияларды енгізуге бағытталған ауқымды реформалар мен жаңғыртулар жүргізілуде. Бұл тұрғыда энергетика секторындағы қазіргі тенденциялар мен өзгерістерді ескеру өте маңызды, өйткені олар экономиканың дамуына және халықтың өміріне айтарлықтай әсер етеді. 2024 жылдың бірінші жартыжылдығында басым секторда не істелінді? Бұл туралы  Primeмinister.kz сайты редакциясының шолуынан біле аласыздар. 

МҰНАЙ МЕН ГАЗ ӨНДІРУ

2024 жылдың басынан бастап Қазақстан мұнай мен газ өндірудің айтарлықтай көлемін көрсетіп келеді. Барлығы 44,7 миллион тонна мұнай мен газ конденсаты өндірілді, оның негізгі бөлігі «Теңізшевройл», «Қарашығанақ Петролеум Опер. Б.В.» және «Норт Каспиан Оперейтинг Компани Б.В.» компанияларына тиесілі. Газ өндірісі де 30 миллиард  текше метрге дейін өсті, бұл өткен жылдың сәйкес кезеңімен салыстырғанда 101 пайызға жоғары.2024 жылдың бірінші жартыжылдығында Қазақстанның мұнай саласы тұрақты серпінді көрсетті. Атап айтқанда, «Қарашығанақ Петролеум Опер. Б.В.» (КПО) компаниясы Қарашығанақ кен орнын кеңейту бойынша белсенді жұмыс істеуде. Игеру жоспары шеңберінде сұйық көмірсутектерді өндірудің қазірігі деңгейін жылына 11 миллион тонна деңгейінде ұстап тұруға бағытталған Қарашығанақ-1А және Қарашығанақ-1Б кеңейту жобалары көзделген. Аталған жобалар 2028 жылы аяқталады деп күтілуде.«Теңізшевройл»  компаниясы өндірісті жылына 12 миллион тоннаға ұлғайтуға мүмкіндік беретін Келешекте кеңейту және Ұңғыма ернеуінің қысымын басқару жобасын іске асыруды жалғастыруда. 2024 жылдың сәуірінде «Теңізшевройл»  Ұңғыма ернеуінің қысымын басқару жобасының нысандарын пайдалануға кірісті, ал Келешекте кеңейту жобасының  іске қосылуы 2025 жылдың маусымына жоспарланған.

ГАЗ САЛАСЫНЫҢ ДАМУЫ

Газ өндіру көлемі 2013 жылғы 42,3 миллиард  текше метрден 2023 жылы 59,1 миллиард  текше метрге дейін ұлғайды. 2024 жылдың 6 айының қорытындысы бойынша газ өндіру көлемінің өсуі де оң серпінді көрсетіп отыр. 2030 жылға қарай өндіріс көлемі 91 миллиард  текше метрге дейін өседі деп күтілуде.2023 жылдың қорытындысы бойынша Қазақстанда газбен қамту деңгейі 60 пайызды құрады, табиғи газға 12 миллион адам қол жеткізе алды. 2024 жылға 128 елді мекенді газдандыру жоспарланған, бұл газбен жабдықтау деңгейін 61,8 пайызға дейін арттырады. 2024 жылдың бірінші жартыжылдығында 107 жобаны іске асыруға 89,3 миллиард теңге бөлінді. Бұл 232,6 мыңнан астам халқы бар 44 елді мекенді газбен қамтамасыз етуге мүмкіндік береді. Бұдан басқа, жыл соңына дейін 300 мыңнан астам адамды газбен қамтамасыз етуге және 1,7 мың шақырым газ құбырларын жаңғыртуға,  яғни жаңа құрылысқа қосымша 105,4 миллиард  теңге бөлінетін болады.

ЖЫЛУМЕН ЖАБДЫҚТАУДЫ ЖАҢҒЫРТУ

Энергетика министрлігі жылумен жабдықтау жүйелерін жаңғырту жұмысын жалғастыруда. Бекітілген кесте шеңберінде 9,3 мың шақырым электр беру желілеріне, 195 қосалқы стансаларға, 1 537 тарату пункттеріне және трансформаторлық қосалқы стансаларға күрделі жөндеу жүргізілді. Биыл 20,8 мың шақырым электр беру желілері мен 422 қосалқы стансаға жөндеу жүргізу көзделген, сондай-ақ 10 энергоблокты, 55 қазандықты және 45 турбинаны күрделі жөндеу жоспарланып отыр.

ЭЛЕКТР ЭНЕРГИЯСЫ ӨНДІРІСІ

2024 жылдың бірінші жартыжылдығында Қазақстанда 60,169 миллиард  кВт/с тұтыну кезінде 60,449 миллиард  кВт/с электр энергиясы өндірілді. Бұл көрсеткіштер еліміздің электр желілік инфрақұрылымының тұрақтылығын көрсетеді.

БАЛАМАЛЫ ЭНЕРГИЯ КӨЗДЕРІН ДАМЫТУ

2024 жылдың алғашқы 6 айында жаңартылатын көздерден электр энергиясын өндіру көлемі сағатына 3,8 миллиард  кВт құрады, бұл электр энергиясын өндірудің жалпы көлемінің 6,47 пайызын құрайды. Елімізде белгіленген қуаты 2,9 мың МВт болатын 148 ЖЭК нысаны жұмыс істейді. Осы жылдың соңына дейін қуаты 196,9 МВт болатын 6 жаңа ЖЭК жобасын пайдалануға беру жоспарлануда.

ЭЛЕКТР ЭНЕРГЕТИКАСЫ ИНФРАҚҰРЫЛЫМЫН ЖАҢҒЫРТУ

Инвестициялық бағдарламалар шеңберінде электр желілік шаруашылықты реконструкциялау және жаңғырту жұмыстары жүргізіліп жатыр. 2024-2029 жылдары 300 миллиард теңгеге дейінгі жобаларды қаржыландыру жоспарлануда. «Тарифті инвестицияға айырбастау» бағдарламасы шеңберінде қайтарымды инвестициялардың жылдық лимитін 32 миллиард  теңгеден 428 миллиард теңгеге дейін ұлғайту көзделген, бұл қолданыстағы энергетикалық объектілерді жаңғыртуға мүмкіндік береді.

ЭНЕРГЕТИКА САЛАСЫН ЦИФРЛАНДЫРУ

2024 жылы бірнеше негізгі бастама жүзеге асырылды. Атап айтқанда, жер қойнауын пайдаланушылардың лицензиялық-келісімшарттарына цифрлық мониторинг жүргізу бойынша пилоттық жоба іске қосылды. «Цифрлық генерация картасы» модулі тәжірибелік пайдалануға енгізіліп, жаңартылатын энергия көздері бойынша есептерді қабылдау басталды. «Энергетиканың цифрлық платформасы» шеңберінде энергия өндіруші кәсіпорындардың паспорты мен мемлекеттік органдар мен тұтынушыларға арналған кабинеттерді қоса алғанда, түрлі модульдер әзірленіп, енгізілді. Осы жылға арналған жоспарлар жүйені дамытуды және процестерді одан әрі цифрландыруды қамтиды, бұл энергетика ресурстарын басқарудың ашықтығы мен тиімділігін арттыруға ықпал етуі тиіс.Сонымен қатар мемлекеттік қызметтерді автоматтандыру және мұнай-газ саласы үшін тауарлардың электронды жіктеуіштерін құру жобаларын атап өткен жөн. Жасанды интеллект элементтерін пайдалана отырып, жеткізу жоспарын автоматтандыру, мотор майларын таңбалау және қадағалау бойынша пилоттық жобаларды іске қосу жұмыстары жүргізіліп келеді.

ЗАҢНАМАДАҒЫ ӨЗГЕРІСТЕР ЖӘНЕ ЖАҢҒЫРТУ

2024 жылғы 8 шілдеде Қазақстанда «Жылу энергетикасы туралы» Қазақстан Республикасының заңы қабылданды, бұл жылу энергетикасы саласындағы қоғамдық қатынастарды реттеудегі маңызды қадам болды. Аталған заң алғаш рет жылу энергиясын өндіруге, тасымалдауға, сатуға және тұтынуға қатысты нормаларды жүйеледі. Бұл құжаттың негізгі мақсаты – жылумен жабдықтау жүйелерінің сапалы жұмыс істеуін және дамуын қамтамасыз ету. Жаңа заң шеңберінде жылу энергетикасы саласының үздіксіз жұмыс істеуін қамтамасыз ету үшін реттеу жүйесі жаңғыртылды, жаңа тетіктер енгізіліп, қолданыстағылары күшейтілді. Сондай-ақ мемлекеттік реттеудің мақсаттары, міндеттері мен қағидаттары айқындалып, саланың даму жағдайын жоспарлау және бағалау тетіктері енгізілді. Бұған жылумен жабдықтау жүйесін құрылымдау, процеске қатысушылардың құқығы мен міндеттерін реттеу, тарифтік реттеу тетіктерін жаңарту және энергия үнемдеуді қолдау кіреді.

Primeмinister.kz