Дархан Өскенбайұлының айтуынша, оқушылардың қауіпсіздігі үшін білім беру нысандарында барлық жағдай жасалған. Ең бастысы ахуал бақылауға алынып, жоспарға сәйкес тұрақты түрде түрлі бағытта іс-шаралар өткізіліп тұрады. 

– Білім беру нысандарында 54 062 адамды қамти отырып төтенше жағдайлар туындаған жағдайда оқу орындарының ғимараттарынан қауіпсіз эвакуациялау бойынша 928 түрлі оқу-жаттығу өтті. Сонымен қатар 107 141 оқушы қатысқан 818 интерактивті сабақ, 16 933 оқушыны қамтыған 505 ашық сабақ ұйымдастырылды. Осы секілді іс-шаралар қатарында мектепке дейінгі мекемелердегі 3 273 баланың қатысуымен өткен 169 конкурс, өрт сөндіру бөлімдеріне жасалған 82 экскурсия бар. Сондай-ақ өрт сөндіру бөлімдерінде «Ашық есік күні» тақырыбында 39 іс-шара өтсе, оған 677 оқушы қатысты. Барлық мектептерде онлайн режимде 42 мыңнан астам ата-ананы қамти отырып, өрт қауіпсіздігі және судағы қауіпсіздік талаптарын сақтау бойынша бейнероликтер көрсетілді, – дейді Д.Өскенбайұлы.

Облысымызда 12 жазғы сауықтыру лагері болса, 7 демалыс орнында өрт қауіпсіздігін қамтамасыз етуге жауапты адамдарға нұсқау бере отырып, өрт қауіпсіздігі талаптарының сақталуына тексеру жүргізілген. Профилактикалық жұмыстарды жүргізу бойынша көрсеткіштер алдыңғы жылға қарағанда 3 есеге ұлғайған. Өндірістік және тұрмыстық өрттердің саны 11,4 пайызға, қаза тапқан және зардап шеккен азаматтардың саны 1,8 есеге төмендепті.

«AR-AI»-ақпарат