№8 қалалық емхананың қыз-келіншектерге арналған алдын ала қарау бөлімінің акушер-гинекологі Бағила Байназарованың аталған бөлімде табан аудармай жұмыс істеп келе жатқанына 20 жылға жуықтаған. Ол 1965 жылы 8 шілдеде Сарысу ауданы, Тоғызкент ауылында дүниеге келген. Тараз қаласындағы Жамбыл медициналық жоғары колледжін тәмамдаған жас маман бастапқыда қалалық перинаталды орталықта жұмыс істейді. Одан соң М.Х.Дулати атындағы Тараз өңірлік университетінде «Психология» мамандығы бойынша білім алады. 

– Күніне алдыма 50 шақты әйел келеді. Көбіне қыз-келіншектер профилактикалық тексеріс, ісік ауруларының алдын алу үшін анализ тапсыру, без ісіктерін анықтау қайырылады. Теріде ауру жоқ па, сүт бездері ісінбеген бе, фиброзды мастопатия бар ма, бір сөзбен айтқанда басынан бақайшағына дейін тексеремін. Обыр немесе басқа да аурулардың белгілері байқалса арнайы мамандарға жіберемін, – дейді Бағила Байназарова.

Үш ұлдың анасы, үш немеренің әжесі Б.Байназарованың жұмыс өтілі отыз жылдан асыпты. Өте қарапайым жанның әр күні анализдерді талдаумен, әйелдерді тексерумен, кеңес берумен өтеді. 

– Әрбір әйел алты ай сайын скринингтен өтіп тұруы керек. Қазір әйелдерде эрозия, кеудесіндегі мастопатия, миома көп. Біз әрбір пациентке қамқорлықпен қарап, жанашырлықпен жауап береміз.

Әйел баласының жаратылысы бөлек. Сондықтан әрдайым күтім қажет. Әйел адамның организмі босанған соң үш жылда қалыпқа келеді. Соны ескеру керек.Акушер-гинеколог мамандығы білім мен дағдылардың кең ауқымын ғана емес, сонымен қатар эмоционалдық төзімділікті және лезде жауапты шешімдер қабылдау қабілетін де қамтиды, – деді дәрігер.

Дәрігер әйелдердегі бедеулік, киста, ісік, қабыну, онкологиялық аурулардың алдын алу үшін қарапайым ғана тазалық мәселесін сақтауды, жыныстық сауаттылыққа мән беру керектігін ескертті. 
Дәрігердің үш қаруы бар. Бірі – пышақ, екіншісі – шөп, үшіншісі – сөз. Бағила Байназарова сөзі шипалы, қолы алтын дәрігердің бірі. Қыз-келіншектердің денсаулығын басты орынға қойып, тексеріп, ауруын анықтап, ем береді, сөзбен дем береді.

 Эльмира Байназарова