Бұл жерде Мемлекет басшысы Қасым-Жомарт Тоқаевтың Шанхай ынтымақтастық ұйымының құрылуының бірінші күнінен басы-қасында болғанын, көптеген келіссөз жүргізуге, тиісті құжаттарды дайындауға қатысқанын айта кеткен жөн.Қытайдың «Синьхуа» агенттігіне берген сұхбатында Қазақстан Президенті Қасым-Жомарт Тоқаев ШЫҰ-ға төрағалық ету өте маңызды және аса жауапты екенін атап өтіп, барлық күш-жігеріміз қауіпсіздік мәселелерін шешудің ортақ жолдарын әзірлеуге, сауда-экономикалық ынтымақтастықты нығайтуға, қоршаған ортаны қорғауға және халықтар арасындағы достық байланыстарды нығайтуға бағытталғанын баса айтқан.

Саммиттен екі күн бұрын Қазақстанға мемлекеттік сапармен Қытай Халық Республикасының Төрағасы Си Цзиньпин келді. Мәртебелі қонақты Президент Қасым-Жомарт Тоқаев Астана әуежайында салтанатпен қарсы алды, Ақорда резиденциясында да салтанатты қарсы алу рәсімі өтті. Нәтижесінде жоғары деңгейде екіжақты келіссөздер жүргізіліп, бірқатар маңызды құжаттарға қол қойылды.  Теледидар арқылы байқағаным, барлық екіжақты кездесулер, сұхбаттасу, шараларға қатысу өте жылы атмосферада, жоғары деңгейде сәтті өтті деп отырмын. 

Қытай басшысы Си Цзиньпин қазақ жерінде құрмет көрсеткені үшін Қазақстан Президентіне алғыс айтып, сөзін «Құрметті Президент мырза, қымбатты досым!» деп бастады.

Ал Мемлекет басшысы Қасым-Жомарт Тоқаев дипломатиялық 32 жыл ішіндегі ынтымақтастық нәтижесінде екіжақты байланыстарымыз мәңгілік әрі жан-жақты стратегиялық серіктестіктің бұрын-соңды болмаған деңгейіне көтерілгенін, көптеген жетістікті айта келе: «Тарих қойнауына үңілетін болсақ, Қытай елі қазақ халқына ешқашан жамандық жасаған жоқ, ешқандай тосқауылдар құрған емес.Жәрдем ғана берген, біздің елдеріміз әрдайым тығыз байланыста және шынайы достық қарым-қатынаста болды. Бүгін де солай және солай болып қала бермек. Мен бұған кәміл сенемін», – деді. Біз де сенеміз! Бейбіт өміріміз мәңгілік болсын!

Қасымхан Төлендиев, 
«Жаңару» Сыбайлас жемқорлыққа қарсы жалпыұлттық қозғалыс»

республикалық қоғамдық бірлестігінің облыстық филиалының директоры