«Ауыл» халықтық-демократиялық патриоттық партиясының атынан кезектен тыс президент сайлауына түсетін Жигули Дайрабаев сайлауалды жобаларының бағытын  айтты, деп хабарлайды Arainfo.kz тілшісі Baq.kz-ке сілтеме жасап.

Біздің негізгі мақсатымыз тек ауыл шаруашылығын емес, бүкіл ел халқының әл-ауқатын, тұрмыс жағдайын жақсату. Халықтың байқуатты өмір сүруі негізгі бағыт пен бағдар болмақ, - деп жауап берді ол.

Әрине, Президент болу оңай нәрсе емес. Өзімінің жеке басымның мүддесінен халықтың мүддесі жоғары болуы керек. Халыққа адал қызмет ету керек. Мен азамат ретінде өмірлік тәжірибем бар. Сондықтан мені партиялас әріптестерім ұсынған кезде біраз ойландым, - деді Қазақстан фермерлер қауымдастығының басқарма төрағасы Дайрабаев.

Қанша дауыс жинайтынымды уақыт көрсетеді. Алдын ала мындай нәтижеге жетеміз деп кесіп айтуға болмайды. Лайықты дауыс жинайтыныма сенемін. Әріптестерім үлкен үміт артып отыр, - деді Дайрабаев.

Қоғамда ең бірінші әділеттілік болуы керек. Әділ қоғам құруға талпынумыз керек. Қоғамда белгілі бір тәртіптің болғаны жөн. Біз өз бағдарламамызды енді дайындаймыз. Мемлкетте азық-түлік қауіпсіздік мәселесін шешілуі керек. Қазір ауыл халқының бәрі қалаға көшіп жатыр. Жұмыссыздық мәселесі тағы бар. Ауылдың инфрақұрылымына жөндеу жұмыстарын жүргізу қажет. Осы мәселелердің төңірегінде әрекет жасаймыз, - деді фермерлер қауымдастығының басқарма төрағасы.

Қазіргі геосаяси ахуалды да ескеріп отырмыз. Оны өздеріңіз де көріп, біліп отырсыздар. Сондықтан басты мәселе мемлекеттің, халықтың бірлігі болуы керек. Қоғамда тыныштық болуы қажет. Қазақ бата бергенде айтатын сөз бар. «Сыртымыздан жау алмасын, ішімізден дау алмасын». Менің негізгі қағидам солай, - деді Жигули Дайрабаев