Ел басына күн туған сәтте енжарлық танытқанды жөн көрмеген тараздық кәсіпкерлер Ақтөбе облысының Ойыл ауданына азық-түлік, гигиеналық заттар, шағын қайықтар, арнайы төсеніштер, көкөністер мен жемістер, киім-кешек тиелген 10 көлік көмек жіберді. Сауапты іске облыстық Қазақстан халқы Ассамблеясы да белсенді атсалысты.

Республикалық дүнгендер этномәдени бірлестігі мен облыстық «Вынхуа» дүнгендер этномәдени бірлестігі тұрмысқа қажетті заттарды және азық-түлік өнімдерін 2 ауыр жүк көлігіне тиеп, Ақтөбе облысына жіберді. Сондай-ақ «Шиват Цион» еврей этномәдени бірлестігі, гректер қоғамы, қырғыз, ұйғыр, татар этномәдени бірлестіктері мен Ассамблея жастары бірлесіп су тасқынынан зардап шеккендерге гуманитарлық көмек ұйымдастырды.

– Қазақстан – біздің ортақ үйіміз. «Күшіміз – бірлікте!» акциясы аясында аянып қалмауға бекіндік. Әрбір этномәдени бірлестік мүшелері қолдан келген көмегін көрсетуде. Бірі аяқкиім, бірі қалың киім, енді бірі төсеніш, қап-қап күріш, ұнын әкеліп, жұдырықтай жұмылуда. Гуманитарлық көмек жинау пункті «Достық» үйінде орналасқан. Көмек көрсеткісі келген азаматтар әлі де үлгереді, – дейді облыстық «Манас ата» қырғыз этномәдени бірлестігінің төрағасы Абзалбек Меңдібек. Еске сала кетейік, облыстық төтенше жағдайлар департаментінің жедел тобы су басқан өңірлерге барып, төтенше жағдайдың зардабын жоюға көмектесуде.

Эльмира Байназарова