– Бүгінде Тараз қаласы тотыдай таранып, дамудың даңғыл жолына түсті. Шаһар көлемінде жанданып жатқан жобалар барлық салаға серпін беріп, көкжиегін кеңейтуде. Өткен жылдың өлшемінде толайым тірлік атқарылғанына тұрғындар куә. Әлеуметтің әлеуеті артып, бұқара мен билік арасында берік байланыс орнады. Сондай-ақ 2023-2025 жылдарға арналған қаланың даму картасы жаңа белестер мен тың бастамаларға жол ашып отыр, – деген Бақытжан Әмірбекұлы сан салада қолға алынған ілкімді істерге тоқталды. Бүгінгі күні қалада баспана бақытына кенелгендер көбейіп келеді. Мәселен, 2023 жылы бюджет есебінен 25 көпқабатты тұрғын үйдің құрылысын жүргізу межеленген. Көне шаһардың 2023-2025 жылдарға арналған даму картасы аясында өткен жылы Ы.Сүлейменов көшесінің соңындағы 12 тұрғын үйдің құрылысы аяқталып, пәтер кілттері иелеріне табыс етілді. Ал А.Асқаров көшесінің соңындағы 16 көпқабатты тұрғын үй 2024 жылға өтпелі. Жағымды жаңалықтың бірі – осы жылы «Ұлы дала» ықшамауданынан 34 көпқабатты тұрғын үй пайдалануға беріледі.

Білім саласында да былтыр жеткен жетістік толайым. Атап айтсақ, 2023 жылы жалпы құны 13,2 миллиард теңгені құрайтын 8 мектептің құрылысын жүргізу жоспарланса, бүгінгі таңға «Ұлы дала» ықшамауданындағы 1 200 орындық мектептің және №6 орта мектептің спортзалына жапсарлас ғимараттың құрылысы аяқталған. Қалған 6 мектептің құрылысы қарқынды жүргізілуде. Спорт саласында биылға жоспарланған жоба аз емес. Мәселен, осы жылы «Ұлы дала» ықшамауданынан спорт кешенін салуға жобалық-сметалық құжаттамалар әзірленсе, 225 миллион теңгеге 9 спорт алаңшасын салу жоспарлануда. Олар «Самал», «Химик», «Бәйтерек», «Қайнар», «Қаратау», «Жиделі», «Бурыл», «Қарасу», «Ақбұлақ» ықшамаудандары мен тұрғын алқаптарында бой көтереді. Жол жөндеу жұмыстары да қалада қарқын алуда. Соның дәлелі – «Бурыл А, Б, В» тұрғын алқаптарындағы 33,7 шақырымды құрайтын 75 көшеге асфальт жол төсеу қарастырылған. Өткен жылы 13 көше асфальтталды. Қалған 62 көшені биыл аяқтау жоспарлануда. Ал «Барысхан» тұрғын алқабы бойынша жалпы ұзындығы 16,2 шақырымды құрайтын 24 көшені асфальттау көзделген. Өткен жылы қоғамдық көлік жүретін Құрманбетов көшесіне жол жабыны төселді. Қалған көшелер биыл аяқталады.

Атқарылған жұмыстар нәтижесінде қазіргі таңда қанағаттанарлық жағдайдағы жолдардың үлесі 61,6 пайыздан 65 пайызға дейін артып отыр. Ал 2024 жылы 78,1 шақырымды құрайтын 110 көшені орташа жөндеу жоспарланған. Сонымен қатар Қолбасшы Қойгелді, Рысбек батыр және А.Асқаров көшелері қайта жаңғыртудан өтеді. Қаладағы ең өзекті мәселенің бірі – қоғамдық көліктерді жаңарту бойынша да бағдарын тапқан тірлік көп. Мәселен, автобус парктерін жаңарту мақсатында 2023 жылдан бастап жыл сайын үлкен және орта сыйымдылықты 70 автобустан алу жоспарланған. Нәтижесінде 2023 жылы 73 жаңа автобус жеткізілсе, қала аумағына 36 аялдама орнату үшін қалалық бюджеттен 95,2 миллион теңге қаралып, толығымен игерілді. Тағы бір жағымды жаңалық, 75 аялдама орнату, тасымалдаушы мекемелер есебінен 70 жаңа автобус алу, 5 жаңа маршруттық бағыт ашу биылға межеленіп отыр. Тараз қаласының дамуын заманауи жоспарлау, тұрғындарға қажетті әлеуметтік инфрақұрылымды тиімді салу үшін жаңа Бас жоспар әзірленіп, бекітілді. Қазіргі уақытта қала аумағы 18 787 гектарды құраса, жаңа Бас жоспарда аумағы 30 542 гектарға ұлғаяды. Қала аумағы кеңейгеннен кейін тұрғындар саны да артады. Бүгінде қаланың халық саны 431 мыңға жуықтаса, жаңа Бас жоспарға сай шаһар маңындағы Жамбыл және Байзақ аудандарынан 46 500 адам тұратын аумағы 11 755 гектарды құрайтын 14 елді мекеннің қосылуы көзделіп отыр.

Бұл жағдайда қаланың халық саны 477 мыңнан асады. Келесі кезекте бұқаралық ақпарат құралдарының өкілдері көкейдегі сауалдарын жолдады. Айталық, ардагер журналист Баймаханбет Ахмет жергілікті мерзімді басылымдардың таралымын арттыру бойынша кешенді шараларды қолға алу керектігін айтса, Қазақстан Журналистер одағы облыстық филиалының төрағасы Жаңабай Миллионов қарымды қаламгер Баттал Жаңабайұлының 95 жылдығына орай тұрған үйіне ескерткіш-тақта орнатуды сұрады. Сонымен қатар «AR-AI» газетінің бас редакторы Тұрсынбек Сұлтанбеков шаһарға жастардың басын бір арнаға тоғыстырып, идеяларын жүзеге асыруға мүмкіндік беретін еңселі ғимарат қажеттігін жеткізді. Бұдан бөлек қала мәдениетін қалыптастыру, көшелерді күл-қоқыстардан тазарту, қоғамдық көлік жүргізушілерінің мәдениетін көтеру секілді өзекті мәселелер де көтерілді.

Барлығын мұқият тыңдаған қала әкімі әрбір ұсыныс-тілек назардан тыс қалмайтынын баса айтты. – Таразда осы күнге дейін тындырылған тірлік жетерлік. Сондай-ақ шешімін таппай отырған мәселелер де аз емес. Оларды бір күнде шешіп тастау мүмкін емес екені де белгілі. Барлығы кезең-кезеңімен, жоспарға сай жүзеге асырылып келеді. Қазіргі таңда біздің алға қойған басты міндетіміз – шаһардың инфрақұрылымын дамытып, тұрғындардың жайлы тұрмысына жағдай туғызу. Қазақта «Келісіп пішкен тон келте болмайды» деген аталы сөз бар. Сондықтан осында отырған әрқайсысыңыздың ұтымды ұсыныс пен талап-тілектеріңіз мен үшін маңызды. Бүгінгі басқосуымыздың негізгі мақсаты да осы. Тараз – баршамыздың ортақ мекеніміз. Сол үшін оның алдағы бағыт-бағдарын өздеріңіз секілді тұрғындармен бірге айқындауымыз қажет, – деген Бақытжан Әмірбекұлы мұндай жүздесулер алдағы уақытта да жалғасатынын жеткізді.

Тараз қаласы әкімдігінің

медиа орталығы