Демек, бүгінгі жаһандану заманында Қазақстан Республикасы үшін Отанымыздың тарихы мен айбарын, тәуелсіздігімізді тұғырлы ету жолындағы батыл шешімдер мен істерді жаңашыл мәдени танымдық пішінде жеткізу айрықша маңызды болғандықтан өте жауапты тақырыпқа айналып отыр.

XX ғасыр мен XXI ғасырдың тоғысында қол жеткізген егемендігіміздің айрықша нышаны ретінде, мемлекеттігіміз бен елдік ұстанымымыздың айнымас қағидаты ретінде жаңа әлемдегі жаңа Қазақстанның бай тарихын, баянды дәстүрін таныстыру мақсатында елімізде бұл бағытта көптеген көңілге қонымды істер жүзеге асырылып келеді.

Сондай игі істердің бірі – 2010 жылы аудан әкімінің шешімімен аудандық тарихи-өлкетану музейі ашылды. Музей қызметкерлерінің алдында тұрған жауапты міндет – ежелгі тас дәуірінен бастап, бүгінге дейінгі еліміз тарихын жалпы азаматтық құндылықтар талғамы мен талабы тұрғысынан көрсете білу.

Қазіргі уақытта барша елдік мәселені білім мен ғылым тұрғысынан байыптау қажеттігі туып отыр. Бұл тұрғыдан алғанда музей мәдениетке ынтызар қауымға жәдігерлікті қаз-қалпында көрсетіп, оның төл тарихынан мол ақпарат беретін жетекші, көркемөнер және тарихи, мәдени орталықтың біріне айналары сөзсіз.

Әлбетте, музейді құрып, қалыптастыру маманынан кәсіби адалдық пен шеберлікті талап етеді, оған сауатты да сауапты жұмыс істеуді жүктейді. Ал дүниеде бәрі де өзгеретінін, заманның құбылатынын ескерсек, уақытпен үндесіп, өз дәуірінің тілінде сөйлеп тұратын экспозициялар жасақтаудың маңызы зор. Қазіргі заманда музейлер өз жұмысын толыққанды атқару үшін қызметін жаңа жетістіктермен, тың әдістермен және озық технологиялармен үнемі байытып отыруы тиіс.

Бұл ретте ғасырлар бойы қалыптасқан осы саланың дәстүрін мұқият сақтау, мемлекеттік мүддені алтын арқау ету – маңызды қағидат дер едік. Мемлекет басшысы руханиятты дамытуға үлкен мән беріп отыр. 2024 жылы елімізде Көшпенділер ойындары өтетіні белгілі.

Айтулы іс-шара ұлттық спорт түрлерін жан-жақты насихаттауға ғана емес, мәдени байланыс пен қарым-қатынасты нығайтуға септігін тигізері сөзсіз. «Біз озық ойлы ұлт ретінде тек қана алға қарауымыз керек» деген сөздің астарында үлкен жауапкершілік, атқарылатын ауқымды тірлік жатыр. Ал белгіленген маңызды міндеттерді орындауға жұмыла кіріссек, әрине, алынбайтын асу болмайтындығы анық.

Айнагүл Мамытбекова, 

аудандық тарихи-өлкетану музейінің ғылыми қызметкері,

Байзақ ауданы