Жақында ҚР Оқу-ағарту министрлігі мен «Дарын» республикалық ғылыми-практикалық орталығының ұйымдастыруымен Астана қаласында ауыл мектептерінің оқушыларына арналған республикалық олимпиаданың қоғамдық-гуманитарлық бағытындағы пәндер бойынша қорытынды кезеңі өтті. Республикалық олимпиада ҚР Оқу-ағарту министрі Ғани Бейсембаевтың тікелей тапсырмасымен алғаш рет өткізіліп отыр. Олимпиаданың мақсаты – ауылдық жерлердегі мектеп оқушыларының қабілеттерін анықтау және қолдау, неғұрлым академиялық қабілетті оқушыларды іріктеу, олардың зияткерлік дамуы мен кәсіби бағдарлануы үшін оңтайлы жағдайлар жасау. Республикалық олимпиаданың қорытындысы бойынша біздің облыстың 8 оқушысы жеңімпаз атанды. Сондай-ақ 2 оқушы ҚР Оқу-ағарту министрлігінің ІІ дәрежелі дипломы және күміс медалін 2 оқушы иеленді. Сонымен қатар ІІІ дәрежелі диплом және қола медальға 6 оқушы қол жеткізсе, өз білімімен ерекшеленгені үшін 7 оқушы грамотамен марапатталды. Атап айтқанда, Меркі ауданындағы Т.Қожакеев атындағы №39 мектеп-гимназияның 10-сынып оқушысы Айгерім Тоқбай, осы ауданның М.Әуезов атындағы орта мектебінің 10-сынып оқушысы Виктория Клюшниченко ІІ дәрежелі диплом және күміс медаль иегерлері атанды. Аталған аудандағы И.Трубицын атындағы №17 мектеп-гимназияның 11-сынып оқушысы Жәмилә Дәулетиар, М.Әуезов атындағы мектеп-лицейдің 11-сынып оқушысы Наргиз Мададова, Шу ауданындағы С.Шәкіров атындағы орта мектептің 11-сынып оқушысы Аяжан Амантай, С.Естемесов атындағы орта мектептің 10-сынып оқушысы Ақерке Алтынбек қола медаль иегерлері деп танылып, ІІІ дәрежелі дипломмен марапатталды. Қола жүлдегерлердің қатарында Байзақ ауданындағы Ғ.Мұратбаев атындағы мектеп-гимназияның 11-сынып оқушысы Шұғыла Тазабек, Т.Рысқұлов ауданындағы №1 мектеп-лицейдің 11-сынып оқушысы Камилла Шаяхметова да бар. Жуалы ауданындағы №30 Көктөбе орта мектебінің 11-сынып оқушысы Нұрлы Амангелді, Қордай ауданындағы Б.Бөлтірікова атындағы орта мектептің 10-сынып оқушысы Вероника Шокарева, Т.Рысқұлов ауданындағы Ә.Бөкейханов атындағы орта мектептің 11-сынып оқушысы Салима Байдаулет болса, өз білімімен ерекшеленгені үшін арнайы грамотаны еншіледі. Т.Рысқұлов ауданындағы Ә.Бөкейханов атындағы орта мектептің 11-сынып оқушысы Азамат Серік, Байзақ ауданындағы Амангелді орта мектебінің 10-сынып оқушысы Аруназ Мутан, Шу ауданындағы Е.Бекмаханов атындағы мектеп-гимназияның 10-сынып оқушысы Зивара Абылай, Жамбыл ауданындағы Айша бибі атындағы орта мектептің 11-сынып оқушысы Асылай Шүкірбай да зейіндерімен ерекшеленіп, арнайы грамотаға ие болды. Топтан оза шапқан жеңімпаз оқушыларды құттықтаймыз!

Ақтоты Жаңабай