Облыстық полиция департаментінің бастығы Арманбек Баймурзиннің тапсырмасы бойынша полиция департаменті бастығының орынбасары Нұржан Рахметуллаевтың төрағалығымен Мойынқұм ауданы полиция бөлімінің жеке құрамы арасында жедел кеңес өтті. Аталған кеңес барысында өткен жылғы жедел-қызметтік жұмыс қорытындылары қаралып, алдағы кезеңге арналған міндеттер белгіленді. Мойынқұм ауданы полиция бөлімінің бірінші орынбасары Үсен Айнақұл баяндағандай, аудандағы жедел жағдай тұрақты. Өткен жылдың қорытындысы бойынша, қылмыстар саны 16,8 пайызға төмендеген. Қоғамдық орындарда, кәмелетке толмағандар арасында және оларға қарсы мас күйінде жасалған қылмыстардың саны азайған. Тонау және автокөлікті айдап әкету деректері тіркелмеген. Нұржан Рахметуллаев учаскелік полиция инспекторларының рөлін күшейту, жол қауіпсіздігі және жергілікті атқарушы органдармен іс-қимыл, алаяқтыққа қарсы күресті күшейту және қоғаммен тиімді өзара байланыс жасауға қатысты жұмыстарды жандандыру бойынша аудандық полиция бөлімінің қызметіндегі негізгі басым бағыттарды атап көрсетті. Қылмысқа қарсы күресте және қоғамдық қауіпсіздікті қамтамасыз етуде міндеттерді іске асыру жөніндегі ұйымдастырушылық және тәжірибелік шаралар кешені аудандағы ауыр және аса ауыр қылмыстарды 45,7 пайызға, ұрлықты 24, мал ұрлығын 80, денсаулыққа ауыр зиян келтіруді 66,7 пайызға төмендетуге ықпал еткен. Есірткі бизнесі саласындағы қылмыстарға тиімді тосқауыл қойылуда. 12 айда 20 есірткі қылмысы анықталған. Көлік жолдарындағы өзекті мәселе де сөз болды. Жол-көлік оқиғалары саны 2022 жылмен салыстырғанда 31-ден 37-ге дейін артқан. Жедел-профилактикалық іс-шаралар барысында мас күйінде көлік жүргізген 18 азамат ұсталған. Сондай-ақ жиын барысында құрам арасындағы заңдылық пен тәртіптің жай-күйі, сыбайлас жемқорлыққа қарсы іс-қимыл мәселесі сөз болды. – Жеке құрам арасында заңдылықты сақтау, сыбайлас жемқорлық құқықбұзушылықтарының алдын алу жөніндегі жұмысқа ерекше назар аударылуда. Біздің жұмысымыз халық үшін қолжетімді және ашық болуы тиіс, кері байланыс орнатуды да жалғастыру қажет. 2022 жылдан бастап сыбайлас жемқорлыққа қарсы саясат тұжырымдамасын іске асыру үшін «Integrity Check» ішкі істер органдары қызметкерлерінің адалдығын тексеру бойынша пилоттық жоба іске қосылғаны белгілі. Бұл жобаны іске асыру полицияда сыбайлас жемқорлық көріністерін азайтуға ықпал етеді, – деп атап көрсетті Нұржан Рахметуллаев. Сондай-ақ Нұржан Ермаханұлы полицейлерге Ішкі істер министрінің тапсырмасы бойынша биыл Ішкі істер министрлігінің құрылымында кадрларды жақсарту жылы деп жарияланғанын еске салды. Кадрларды қатаң іріктеу және полиция қатарында тазарту жүргізіп, сыбайлас жемқорлықтың кез келген көріністерінің жолын кесу бойынша жұмыстар жалғасатын болады. Сонымен қатар ПД бастығының орынбасары азаматтарды жеке мәселелері бойынша қабылдап, онда тұрғындардың өзекті мәселелерін, өтініштері мен ұсыныстарын тыңдап, толыққанды жауаптар берді. Сондай-ақ мәселені шешу бойынша жауапты қызметтерге нақты тапсырмалар жүктеді.

Ақтоты Жаңабай