Жақында Бейжіңде Сауда және интеграция министрі Арман Шаққалиевпен келіссөздерден кейін Қытайдың Бас кеден басқармасы Қазақстаннан сүйекті жеміс дақылдарын сатып алуға дайын екендігін білдірді. Осы орайда ҚР Ауылшаруашылығы министрлігі Қытай Халық Республикасы Бас кеден басқармасы мен Астанадағы Қазақстан-Қытай ынтымақтастық комитетінің 11-отырысы аясында тиісті хаттамаға қол қойды. Ол құжатта «Жаңа піскен сүйекті жеміс дақылдарын экспорттық партияларына қойылатын фитосанитариялық талаптар жөніндегі хаттамада экспорт үшін қазақстандық жаңа тас жемістерінің (шабдалы мен өрікті қоса алғанда) барлық қолданылатын қытайлық фитосанитариялық заңдар мен нормативтік актілерге, денсаулық пен қауіпсіздік стандарттарына сәйкес келуі және құрамында карантиндік зиянкестер болмауы және топырақпен араласпауы тиіс», делінген. Қытайға сүйекті жеміс дақылдарын экспорттағысы келетін барлық жеміс-жидек бақтары мен буып-түю кәсіпорындары ҚР АШМ-да тіркеліп, ҚР АШМ-да және ҚХР Бас кеден басқармасында да мақұлдануы тиіс. Буып-түйілген сүйекті жеміс дақылдарын тек сүйекті жемістер бар камерада сақтау керек. Әрбір қорапта жеміс атауы, экспорттаушы ел, өндіру орны, бақшаның атауы немесе коды және орау орны көрсетілген қытай немесе ағылшын тілінде таңбалануы керек. Әрбір қорап пен паллет қытай немесе ағылшын тіліндегі «Қытай Халық Республикасына экспортталды» деген мәтінмен белгіленуі керек. Қазақстандық сүйекті жеміс дақылдарын әкелу порттары ҚХР Бас кеден басқармасы жеміс әкелуге рұқсат берген барлық Қытай порттары мен әуежайларға қатысты мәселе. Естеріңізге сала кетейік, Сауда және интеграция министрі Арман Шаққалиевпен кездесу барысында ҚХР Бас кеден басқармасы Қазақстаннан термиялық өңделген ет өнімдерін жеткізуге қойылған шектеулерді алып тастауға дайын екендігін білдірді. Айта кетейік, бүгінгі таңда Қазақстанда бидай, зығыр тұқымы, арпа, жоңышқа, жүгері, бал, жүн, сүт өнімдері, сиыр еті, қой және шошқа етін қоса алғанда, өсімдік және малшаруашылығы өнімдерінің 23 түрін экспорттау бойынша Қытаймен арада қол қойылған хаттамалар бар.