Вакциналар иммунитетті бұза ма? «Telegram»-да «Pfizer» компаниясының бұрынғы вице-президенті Майкл Йидонның жаңа мРНҚ технологиясына байланысты КВИ-ға қарсы классикалық вакциналарды трансформациялау туралы мәлімдемесі талқылануда. Бұл адамдардың иммунитетінің бұзылуына әкеледі, планетаны депопуляциялау бойынша жаңа жоспар осы. Бұл жалған мәлімдеме. Бұған дейін Майкл Йидон КВИ-ға қарсы вакциналардың клиникалық сынақтарын тоқтатуды талап еткен. Содан кейін вакцинация жүкті әйелдерде түсік тастауға және балалардың өліміне әкеледі деді. Майкл Йидонның сөздерін фактчекерлер бірнеше рет жоққа шығарды. Оның COVID-19 пандемиясы қауіпті емес және вакциналар депопуляция құралы ғана деген сөзін де Пойнтер медиа зерттеулер институты жалған деп атады. «Pfizer-BioNTech» және «Moderna» вакциналары жаңа мРНҚ технологиясында қолданылатыны рас. Тек ол адамдарды зомбиге айналдыру немесе өлтіруге емес, инфекциялар мен аурулардан қорғауға арналған. Негізі мРНҚ жасушаларға ақуыз өндіруге арналған «нұсқауларды» жеткізеді. Оны тани отырып, ағзамыз антигендер қалыптастыра бастайды. Иммундық жүйе антигендердің жау екенін түсініп, антиденелер мен Т-жасушаларын қорғаушыларды дайындайды. Осылайша адам ағзасы «қарсы тұруға» жаттығады. Егер нақты вирус болса, вакцинацияланған адам оны жеңе алады. Вакциналар иммунитетті бұзбай, оны күшейтеді. Бұл ғылыми мәліметтермен дәлелденген. Солтүстік Каролина университетінің биостатистика профессоры Дань Линь «Associated Press» агенттігіне берген сұхбатында табиғи иммунитеттің вакцинация арқылы жойылмай, күшейетінін растады. Даль Линь 5 пен 11 жас аралығындағы балалардың вакцинация тарихы мен клиникалық нәтижелері талданған зерттеу авторларының бірі. АҚШ-тың Ауруларды бақылау және алдын алу орталығы да егудің иммундық реакцияны күшейтетінін растады. Осылайша КВИ-ге қарсы вакцинация біздің иммундық жүйемізді бұзбайтыны, керісінше оның мүмкіндіктерін арттыратыны қуатталып, дәлелденді. Халық санын қысқартпақ Ковидке қарсы вакцинация арқылы халықтың кемуі – бұл Билл Гейтс, Орталық барлау басқармасы, биотехнологтар мен генетиктер мәлімдеді деген жалған ақпарат. Ол көптеген әлеуметтік желілерде әртүрлі нұсқада тараған. Фейкті шығарғандар оны әдейі бұрмалайды. Мәселен, «Pfizer»-дің бас директоры Альберт Бурланың дәйексөзі. Оның 2022 жылы Дүниежүзілік экономикалық форумда сөйлеген сөзінің бейнесі негізге алынған. Онда Бурла компания өз алдына «Pfizer» вакцинасын ала алмайтын адамдар санын 50 пайызға азайту міндетін қойды дейді. Роликті редакциялап, әлеуметтік желілерді пайдаланушылар «Pfizer» директоры командамен бірге халық санын 50 пайызға қысқартпақ деген ақпарат таратты. Фактчекерлер жоққа шығарғаннан кейін жалған видео көптеген әлеуметтік желілерден өшірілді. Халықтың азаюы туралы теорияны 2022 жылдан бастап Жер планетасындағы адамдар саны 0,88 пайызға өскенін де жоққа шығарады. 2023 жылғы жағдай бойынша, COVID-19-ға қарсы вакциналардың 13 миллиардтан астам дозасы егілген. Келтірілген деректер таралған мәлімдемелерге қайшы келеді. КВИ-ге қарсы вакцинация жалғасуда, ал халық саны төмендеп жатқан жоқ, керісінше өсіп келеді. Дәрі-дәрмектер емдемейді Әлеуметтік желілерде дәріханалық дәрі-дәрмектерде графен немесе магниттік қасиеттерге ие басқа заттар бар екенін дәлелдейтін видео жарияланды, демек, мұндай дәрі-дәрмектер емдемейді екен. Бұл жалған. Роликте «Креон» препараты бар капсула магнитке тартылатыны көрсетілген. Алдымен автор капсуламен тәжірибе жасайды. Содан кейін ол оны ашып, ішіндегісін шығарып, бос капсуланың жартысы ғана магниттелетінін көрсетеді. Атап айтқанда, қоңыр түске боялған жағы. Бұл шын мәнінде не екенін түсіндіріп өтейік. «Креон» препараты – бұл қатты желатинді капсулаға салынған түйіршіктер түріндегі ас қорыту ферменттері. Препараттың құрамы нұсқаулықта көрсетілген, түйіршіктерде графен жоқ. Бірақ желатинді капсуланың құрамына магнит өрістеріне тартылатын екі жұпталмаған электронның арқасында магниттік қасиеттері бар темір оксиді кіреді. Темір оксиді темір мен оттегінің химиялық қосылысынан алынған табиғи минералды бояғыш. Бұл пигмент косметика, дәрі-дәрмек және тамақ өндірісінде кеңінен қолданылады. Әдетте бұл бояудың көмегімен ол қызыл, қоңыр, сары немесе қара түсті алады. Видео мұны растайды, өйткені кадрда капсуланың қоңыр түсті бөлігі ғана магнитке тартылатыны көрсетілген, яғни оның құрамында темір оксиді бар. Стратклайд университетінің фармацевтика профессоры Ханна Батчелор «Reuters» агенттігіне берген сұхбатында: «Темір оксиді капсуланың қабығын мөлдір етеді, бұл жарықтың енуін азайтады және дәрі-дәрмектің тұрақтылығын арттырады», деп түсіндірді. Темір оксидін (E172 қоспасы) тағамға бояғыш ретінде қолдану қатаң реттеледі. Бекітілген нормативтік мөлшерде оның қауіптілігі туралы ешқандай дәлел жоқ. Жүргізілген зерттеулер ешқандай улы әсер таппады. Осылайша таралған хабарламаға сенудің қажеті жоқ. Ж.БАҚЫТБЕКҰЛЫ