ҚР Парламенті Мәжілісінің депутаты Ерлан Стамбековтің мерзімді қызметтегі әлімжеттік жасаушылардың әскери қызметшілерді кредит алуға мәжбүрлейтіні туралы айтқан сөзіне орай еліміздің Қорғаныс министрлігі ресми түсіндірме берді. Министрліктің таратқан мәліметінде заң шығарушы билік өкілінің мәлімдемесі негізсіз және шындыққа жанаспайтыны айтылған. Мерзімді қызметтегі сарбаздардың әскери қызмет өткеру кезеңінде әскери бөлімде жүріп несие ресімдеуге мүмкіндігі жоқ көрінеді. Аталған ресми жауапта: «Бүгінгі таңда мерзімді әскери қызметке шақырылғанға дейін жастардың алған несиесі қомақты соманы құрайды. Қарулы Күштер қатарына келгенге дейін 12 мыңға жуық сарбаздың екінші деңгейдегі банктер мен микрокредиттік ұйымдарда 4,8 миллиард теңге көлеміндегі 30 мыңға жуық несиесі болған. Барлық несиелер мен ақшалай қарыздарды кейінге қалдыру мәселелерін шешу үшін Қорғаныс министрлігі мерзімді қызметтегі сарбаздарға арналған «кредиттік демалыс» жобасына бастамашылық жасап, ҚР Қаржы нарығын реттеу және дамыту агенттігімен келісім жасасты. Соның арқасында бүгінде бес мыңнан астам сарбаздың екінші деңгейдегі банктерде және микрокредиттік ұйымдарда 1,4 миллиард теңгеден астам қарызы кейінге қалдырылды. Бұл жұмыс тұрақты түрде жүргізілуде», делінген. Қарулы Күштер мемлекеттің аумақтық тұтастығының және оның егемендігін қорғаудың кепілі ретінде кез келген сәтте Қазақстан халқы мен оның аумағын сыртқы қауіп-қатерден қорғауға дайын. – Айта кету керек, фактілермен расталмаған мәлімдемелер Қарулы Күштердің имиджіне едәуір әсер етіп, армияның беделін түсіреді. Біз мұндай жариялы түрде жасалған мәлімдемені жауапсыздық деп есептейміз. Естеріңізге сала кетсек, бүгінгі таңда Қорғаныс министрлігімен әскери қызметті қолайлы өткеру үшін барлық қажетті жағдай жасалған. Қазіргі уақытта мерзімді қызметтің әскери қызметшілеріне борышын өтеу уақытында несиелік демалыстар беріледі. Одан бөлек мерзімді әскери қызметті өткерген азаматтардың еліміздің жоғары оқу орындарында ҰБТ тапсырмай-ақ тегін және ақылы негізде оқуға құқығы бар. Бұл мәселе бүгінде мүдделі мемлекеттік органдар арқылы оқуға мемлекеттік гранттар беру мәселесі пысықталып жатыр. «Әлімжеттік» терминіне қатысты, бүгінгі күні әскери ортада бұл жағымсыз құбылыстың жоқ екенін айтамыз. ҚР Қарулы Күштерінде, басқа да әскерлер мен әскери құрылымдарында мерзімді қызметтегі әскери қызметшілер үшін қызмет мерзімі – бір жыл. Бұл ретте әскери міндеттерді орындау кезінде аға және кіші буындағы борышын өтеп жүрген әскерилер бір-бірімен тоғыспайды», дейді Қорғаныс министрлігінің өкілдері. Барлық фактілер бойынша қандай да бір құқық­бұзушылық орын алса, әскери полиция және басқа да қылмыстық қудалау органдары жедел тексерулер мен тергеулер жүргізеді, ал оқиғаның заңды не заңсыз екенін бақылауды әскери прокуратура жүзеге асырады. Айта кетейік, Мәжіліс депутаты Ерлан Стамбеков әскери қызметшілерге кредит алуға мораторий енгізуді ұсынған болатын. Ақтоты Жаңабай