Майлы дақылдарға келсек, 65,6 мың гектар алқаптың жарамсыздыққа ұшырауы – 1 300 гектар. Т.Рысқұлов ауданында жарамсыз болып қалған аталған алқапты айтпағанда, қалған 64,3 мың гектардың егіні жиналды. Жалпы өнім – 41,1 мың тонна, орташа өнімділігі гектарына 6,4 центнерді көрсетіп отыр. Бақша дақылдары бойынша айтар болсақ, 16,8 мың гектардың 26 гектар алқабы жарамсыздыққа ұшырап, қалған 16,7 мың гектар 100 пайыз жиналып, барлығы 446,3 мың тонна өнім алынды. Осы жылдың өніміне егілген 10,9 мың гектар қант қызылшасы дақылының ауа райының қолайсыздығына байланысты 6,2 мың гектары жарамай қалды. Нақтылап өтсек, Байзақ ауданында – 756 гектар, Жамбылда – 849, Жуалыда – 14, Қордайда – 332, Меркіде – 1334,6, Т.Рысқұлов ауданында – 439,6, Таласта – 62 және Шуда 2432 гектар алқап жарамай қалды. Нәтижесінде 4,6 мың гектар қант қызылшасының 2,5 мың гектардан астамы жиналды. Бұл көрсеткіш 53,9 пайызды құрап отыр. Қант қызылшасы бойынша барлығы 119,8 мың тонна өнім алынып, оның 114,1 мың тоннадан астамы қант зауытына өткізілді, – деді Нұрби Рахметханұлы. Сондай-ақ басқарма басшысы 2023-2024 жылғы мал қыстату науқанына облыс бойынша 2,6 миллион тонна мал азығын дайындау жоспарланғанын жеткізді. Есепті кезең бойынша жоспар 100,4 пайызға орындалыпты. Оның ішінде, пішен – 2 104,6 мың тонна, пішендеме – 87,3 мың тонна, сабан – 4 13,5 мың тонна, сүрлем – 1 мың тонна немесе 100 пайызды құраған. Қазіргі таңда мал азығын дайындау жұмыстары толығымен аяқталған. Күзгі дала жұмыстарына барлығы 10 063 техника жұмылдырылуда. Оның ішінде 4 570 трактор, 1105 соқа, 461 қопсытқыш, 3927 басқа да техникалар бар. Егін жинау жұмыстарына 15,7 мың тонна дизель отыны бөлініп, әр литрінің бағасы 250 теңгені құрапты. Ауылшаруашылығы тауарларын өндірушілерге 5,1 мың тоннасы таратылған. Сондай-ақ 2024 жылдың өнімі үшін 161,5 мың гектар алқапқа күздік дақылдар егу жоспарланып, оның 161,6 мың гектары орналастырылған. Келесі жылдың өніміне 310,4 мың гектар сүдігер жыртылған. Оның ішінде қант қызылшасы дақылының үлесі 1,6 мың гектарды құрап отыр екен. Баяндамашының есебін тыңдаған облыс әкімі басқарма басшысы мен аудан әкімдеріне бірқатар міндеттер жүктеді. – Ең маңызды мәселелердің бірі – су тапшылығына байланысты шаруаларға берілетін өтемақыны қатаң қадағалау. Төтенше жағдай жарияланып, фермерлер үшін арнайы бөлініп отырған қаражат қажет жанға жеткені жөн. Сондай-ақ ауылдық жерлердегі техникаларды жаңарту қажет. Әсіресе көкөніс сақтайтын қоймалар мәселесіне мән берген жөн. Бұл ретте Солтүстік Қазақстанның тәжірибесін пайдалансаңыздар болады. Жалпы қойма салған шаруаларға 2,5 пайыздық жеңілдетілген несие беріледі, осыны қолға алам деген шаруалардың тізімін жасақтау керек. Тағы бір айта кетер жайт, жергілікті жердегі мәселені сол жердің әкімі шешу керек. Мен облыс әкімі болып тағайындалғалы тұрғындармен жиі кездесу өткізіп жүрмін. Сонда ауданнан, ауылдан тұрғындар келіп, мәселесін шешіп беруімді өтінеді. Мәселені жергілікті жерде шешуге болатынын айтып, неліктен жергілікті жердегі әкімге бармайтынын сұрасам, «қабылдамайды» деп жауап береді. Сонда аудан, ауыл әкімдері бір тұрғынның мәселесін шешіп бере алмаса, несіне басшы болып отыр? Бұл дұрыс емес. Тұрғындардың мәселесін шешуді дұрыстап қолға алыңыздар, – деді Ербол Шырақпайұлы. Жалпы күзгі дала жұмыстарының барысы тұрақты бақылауға алынып, қалыпты жағдайда жүргізілуде. Ақтоты ЖАҢАБАЙ