Жуырда Түркістан қаласында Халықаралық көше театрлары фестивалі өтті. Қазақстанда алғаш рет ұйымдастырылып отырған фестивальға Қазақстан, Түркия, Өзбекстан мен Қырғызстан елдерінен келген үздік 13 өнер ұжымы қатысты. Алғашқы күні 9 өнер ұжымы, екінші күні 4 өнер ұжымы өз қойылымдарын сахналады. Түркістан облысы әкімдігінің қолдауымен, облыстық мәдениет және туризм басқармасының ұйымдастыруымен өткен фестивальдің мақсаты – жастарды азаматтық-патриоттық бағытта тәрбиелеу, көше театрларының мәдениетін көтеру арқылы оның мәдениеттен ажырамас бөлігі ретіндегі рөлін жаңғырту, белсенді қоғамдық бағыт ұстануына жағдай жасау, түркістандықтар мен рухани астана қонақтарының мәдени демалысын ашық алаңдарда театр қызметі формасында дамыту және жетілдіру, салауатты өмір салтын қалыптастыру. Театр ұжымдарының өнеріне суретші, сценограф, Қазақстанның еңбек сіңірген қайраткері Бақыт Сраилов, өнертану кандидаты, Темірбек Жүргенов атындағы Қазақ ұлттық өнер академиясының профессоры Зухра Исламбаева, өнертану кандидаты, Қазақстан театр сыншылар бірлестігінің вице-президенті, Қазақстан Театр қайраткерлері одағының төралқа мүшесі, Қазақстан Жазушылар одағының мүшесі Мұқан Аманкелді, М.Әуезов атындағы Қазақ ұлттық драма театрының қоюшы режиссері Аридаш Оспанбаева қазылық етті. Кәсіби мамандардан құралған қазылар алқасы жіті қадағалап, төрелігін айтты. Фестиваль қорытындысына сәйкес барлық қатысушы ұжымға қаржылай сыйлық берілді. Марапаттау салтанатына Түркістан облысы әкімінің орынбасары Бейсен Тәжібаев қатысып, жеңімпаз ұжымдарды марапаттап, алғысын білдірді. Шара барысында сөз алған өнертану докторы, Т.Жүргенов атындағы Қазақ ұлттық өнер академиясының профессоры, театртанушы, «Құрмет» орденінің иегері, қазылар алқасының төрайымы Бақыт Нұрпейіс фестивальдің жоғары деңгейде өткенін тілге тиек етіп, ұйымдастырушыларға рақметін айтты. Екі күнге жалғасқан фестивальда Асқар Тоқпанов атындағы облыстық қазақ драма театрының ұжымы «Суретші» қойылымымен қатысып, арнайы дипломмен және 500 мың теңге көлеміндегі сертификатпен марапатталды. Қойылымға қатысқан барша актерлерді халықаралық өнер додасындағы табыстарымен құттықтаймыз! «AR-AI» ақпарат