Содан бері білім ордасында қазақ ғылымы мен руханиятының өркен жаюына қомақты үлес қосқан физика-математика ғылымдарының докторы, профессор, академик Нарғозы Тұрсынбайұлының еңбегін насихаттау, жастарға үлгі ету мақсатында аз жұмыс істеліп жатқан жоқ. Мәселен, өткен жылдың қыркүйек айында мектепте Нарғозы Данаев атындағы конференция залы ашылды. Жақсы әке, жақсы ұстаздың тәлімін алып, тәрбиесін көрген, өнегесін бойларына сіңірген ұрпақтары мен шәкірттері Жаңа жыл мерекесі қарсаңында конференция залына интерактивті тақта сыйға тартып, игі іс жасады. Соңғы үлгідегі технология оқушылардың сапалы білім алуына айтарлықтай септігін тигізуде. Одан бөлек 2023 жылдың қаңтар айында «Данаев әлемі» тақырыбында ғылыми-практикалық конференция өтіп, 9-11-сынып оқушыларының ғылыми мақалалары, баяндамалары тыңдалды. Сондай-ақ серіктес мектептердің 7,8,9,10-сынып оқушылары арасында Нарғозы Данаев атындағы математика олимпиадасы өткізілді. Аталған білім бәйгесіне мектебімізден 12 оқушы қатысып, 4 оқушы жеңімпаздар мен жүлдегерлер қатарынан көріне білді. Жалпы Нарғозы Тұрсынбайұлының ұлдары оқушылардың талабын ұштап, ынталандыру мақсатында демеушілік көрсетіп, жақсылық жасаудан танған емес. Айта кетер болсақ, 2022-2023 оқу жылында мектепті үздік аттестатқа бітірген 11-сыныптың оқушылары Адина Сағынтай мен Арайлым Асылбек Нарғозы Данаевтың ұлы тағайындаған стипендия иегері атанып, тегін білім алу мүмкіндігіне ие болды. Бүгінгі таңда мектебіміздің оқушылары білім бәйгелерімен қатар, халықаралық, әлемдік спорттық жарыстарда да атой салып, облысымыздың абыройын асқақтатып жүр. Осы ретте мектебіміздің оқушысы Арсен Сәбитұлының жарқын жеңісін айтпай кетуге болмайды. Бразилияның Рио-де-Жанейро қаласында өткен Дүниежүзілік жазғы гимназияда ойындарында Қазақстан құрама командасының капитаны, мектебіміздің мақтанышы Арсен Жолдығұл бокс бәсекесінде қарсылас шақ келтірмей, алтыннан алқа тағынды. Арсеннің айтулы жарыстарда жасындай жарқылдап, оза шауып жүргеніне сынып жетекшісі Фарида Тәукебаеваның да қосқан үлесі қомақты екенін айта кеткен ләзім. Арсенге де ғалымның ұлы қаржылай сыйлық табыс етті және арнайы стипендия тағайындады. Биыл өзінің тынымсыз да берекелі еңбегінің арқасында ғылым шыңына көтеріліп, абыройға кенелген Нарғозы Тұрсынбайұлының туғанына 75 жыл толып отыр. Соған орай 29 қыркүйек күні мектебімізде бірқатар ауқымды іс-шара ұйымдастырылады. Осы орайда әрдайым игі істерге ұйытқы болып жүретін Нарғозы Данаев атындағы орта мектептің директоры Жанна Оңғарбаеваға, академиктің отбасына, аяулы жары Сәнім Еламановаға, әріптестері мен шәкірттеріне мектеп ұжымы мен ата-аналар атынан риясыз алғысымызды білдіреміз. Айман АБДРАСИЛОВА, Н.Данаев атындағы орта мектептің математика пәнінің мұғалімі