Қоршаған ортаның тазалығына жауапкершілікпен қарау – әрбір азаматтың басты міндеті. Апта сайын ұйымдастырылып жатқан сенбілік жұмыстарына байзақтықтар белсене қатысуда. Еске сала кетсек, «Қоғамдық орындарды абаттандыру және сыртқы безендіру екіайлығын өткізу туралы» Байзақ ауданы әкімдігімен биылғы жылдың 7 ақпанында №50 қаулысы шығарылған. Қаулыға сәйкес аудан аумағында қоғамдық орындарды абаттандыру және сыртқы безендіру екіайлығы осы жылдың 1 наурызынан 30 сәуіріне дейінгі аралықты қамтиды. Құрамы 11 адамнан тұратын штаб құрылып, жұмыс жоспары бекітілді. Осыған орай 4 наурызда аудан аумағында алғашқы сенбілік ұйымдастырылып, оған 971 адам, ақылы қоғамдық жұмыстарға 212 адам тартылды. Сенбілік барысында 200 шаршы метр аумақ тазаланып, 34 тал-дарақ көшеті егілді. 343 талдың бұтақтары кесіліп, реттелді. 11,5 шақырым канал мен арық тазаланып, 18,9 тонна қоқыс шығарылды. Сондай-ақ аудан орталығы Сарыкемер ауылын өзге өңірлермен байланыстыратын автомобиль жолдарының бойына санитарлық тазалық шаралары жүргізілді. «Сарыкемер – Тараз», «Сарыкемер – Байзақ» және «Сарыкемер – Диқан» бағытындағы автомобиль жолдары бойына жүргізілген жұмыстарға бірқатар бөлімдер мен мекеме қызметкерлері белсене атсалысты. Өткен аптаның сенбісінде өткен тазалық жұмыстарына 2 786 адам қатысып, ақылы қоғамдық жұмыстардан 497 адам тартылды. 784 шаршы метр елді мекен абаттандырылып, 379 тал-дарақ отырғызылды. 1 283 ағаштың бұталары реттелді. 11 қоғамдық ғимараттың бас келбеттері, тұрғын үйлердің сырт пішіні мен қоршауы ретке келтірілді. 33,3 шақырым каналдар және арықтар, 11 130 шаршы метр саябақтар мен скверлердің аумақтары, 10 ескерткіштің айналасы тазаланды. 29 кездейсоқ қоқыс орны жойылып, 67,7 шақырым көше, аулалар тазаланды. Айтулы шараға бөлім, мекеме, ұйым қызметкерлері бір кісідей қатысып, әрбір ұжым бөлінген аумақтар мен көшелердегі қоқыс қалдықтарын шығарып, ортақ мекеннің көркеюіне өз үлестерін қосты. «Тазалық – денсаулық кепілі» дейді дана халқымыз. Тазалық бар жерде – ырыс, береке болары сөзсіз. Жинақылық – адамның көңілін көтеріп, жұмыс істеуге деген құлшынысын арттырып, өмірдің мәнін түсінуге жетелейді. Тазалықты сақтау, оған айрықша мән беру – әрбір адамның туған жеріне деген жанашырлықты қажет етеді. Сондықтан өңіріміздің көркейіп, гүлденуіне әрбір тұрғын бейжай қарамай, қоқыс-қалдықтарды кез келген жерге тастамай, таза ұстауға атсалысуы қажет. Өйткені ортақ үйіміздің көркеюі өз ауламызды, ауылымызды таза ұстаудан басталатыны белгілі. Алдағы уақытта да тазалықты сақтау мақсатында жұмыстар жүйелі жоспарға сәйкес жалғаса бермек.

Маулен КЕҢЕСБЕКОВ, Байзақ ауданы әкімдігі тұрғын үй-коммуналдық шаруашылық, жолаушылар көлігі және автомобиль жолдары бөлімінің бас маманы