Айдана 1994 жылы Алматы қаласында дүниеге келген. Кейін ата-анасының шешімімен Шу ауданына қоныс аударады. 2001 жылы Шу қаласындағы Тұрар Рысқұлов атындағы орта мектептің табалдырығын аттап, 2012 жылы үздік аяқтайды.

Оқушы кезінен-ақ кейіпкеріміздің сурет салуға, киім үлгілерін ойластырып, эскиз жасауға, қолөнер бұйымдарын дайындауға деген қызығушылығы ерекше болды. Қарапайым қағаз бен қарындаштан басталған арман уақыт өте нақты мақсатқа айналды.

Арманына қол созған Айдана Алматы технологиялық университетіне оқуға түсіп, тігін ісінің қыр-сырын кәсіби деңгейде меңгерді. Қолына дипломын алған соң бірнеше тігін цехында жұмыс істеп, тәжірибе жинақтады. Жинаған тәжірибе мен ішкі сенім оны өз кәсібін ашуға жетеледі. Сөйтіп осыдан тура алты жыл бұрын Шу қаласынан жеке тігін шеберханасын ашады.

Шебердің басты ерекшелігі – ұлттық нақышқа деген шексіз сүйіспеншілігі. Әсіресе қазақы ұлттық киімдер тігуді жаны сүйеді. Оның шеберханасынан заманауи үлгіде тігілген қамзолдар, көйлектер, шапандар, ұлттық өрнекпен әшекейленген сәнді бұйымдарды көптеп кездестіруге болады. Бұдан бөлек, бас киімдер, ұлттық нақыштағы көрпешелер, сөмкелер, тіпті балаларға арналған ойыншықтар да көздің жауын алады. Әрбір бұйымынан қазақы болмыстың иісі аңқып тұрады.

Айдана үшін тігін – жай ғана кәсіп емес, ол – жүрек қалауы, ұлттық рухты жеткізудің бір жолы.

– Мен үшін ұлттық киім – тарих пен тағылымның, ата-бабамыздан қалған аманаттың көрінісі. Әр оюдың, әр түстің өз мағынасы бар. Сол мағынаны жоғалтпай, бүгінгі заманға сай етіп жеткізу – менің басты мақсатым. Қазіргі жастар ұлттық киімді тек мерекеде ғана емес, күнделікті өмірде де киюге болатынын түсінсе екен деймін. Ұлттық киім киген адам өзін өзгеше сезінеді, бойында бір сенімділік, рух пайда болады, – дейді шебер.

Айдана қолынан келгенін, осы күнге дейін жинаған тәжірибесін өзгелерге үйретуге бел буып, шәкірт тәрбиелеу жолында да еңбек етіп келеді. Бұл бағытта ол Төле би ауылындағы Балалар-жасөспірімдер орталығында «Киімді үлгілеу және құрастыру» үйірмесінің жетекшісі ретінде жұмыс істеуде.

– Қыз баланың бойындағы нәзіктік, әдемілік, сабыр – бәрі қолөнер арқылы көрініс табады деп ойлаймын. Қыздарымды тек тігуге ғана емес, ойлануға, ізденуге, өз қолымен жасаған дүниесіне жауапкершілікпен қарауға үйретемін. Ертең осы балалардың арасынан өз ісінің шеберлері шығып жатса, одан асқан бақыт жоқ, – дейді кейіпкеріміз.

Өнер мен еңбекті қатар алып жүрген жас шебердің бүгінгі жетістігі – тынымсыз еңбектің, талғам мен табандылықтың жемісі. Ұлттық өнерді жаңғыртып, оны жас ұрпаққа насихаттап жүрген Айдана сынды жандар барда қазақ қолөнерінің көкжиегі кеңейе берері анық.

Балнұр ЖЕКСЕНБЕКҚЫЗЫ,

журналист,

Шу ауданы