2025 жылғы жедел-қызмет қорытындылары бойынша өткен кеңесте Жамбыл облысындағы құқықтық тәртіптің жай-күйіне кешенді талдау жасалды. Полиция департаментінің бастығы Қайсар Сұлтанбаев бірқатар негізгі көрсеткіштер бойынша тұрақты оң динамика қалыптасқанын атап өтті.

Қоғамдық орындарда жасалған қылмыстар саны 18,9%-ға, ал көшелерде тіркелген қылмыстар 13,4%-ға азайған. Аса ауыр қылмыстардың 48,3%-ға төмендеуі ең қауіпті қылмыстық көріністердің тұрақтанғанын көрсетеді. Адам өлтіру қылмыстарының ашылуы 100%-ды құрады. Ұрлық қылмыстары 30,7%-ға қысқарған, 18 қылмыстық топ құрықталып, 74 мал ұрысы ұсталды.

Заңсыз айналымнан 9 тонна 242 келі есірткі заттары тәркіленіп, бұл өткен жылмен салыстырғанда 3,25 тоннаға артық. Синтетикалық есірткілерді тәркілеу көлемі 2,5 есеге өскен.

Интернет-алаяқтықпен күрес әлі де өзекті мәселе болып отыр. Бұл бағытта ірі алаяқтық схемалардың жолы кесіліп, 1 982 банктік шот бұғатталды, 65 млн теңгеден астам қаражаттың заңсыз айналымына тосқауыл қойылды.

Кәмелетке толмағандарды қорғау басым бағыттардың бірі болып қалуда. Жасөспірімдерге қатысты қылмыстар 15,8%-ға төмендеді. Жол қауіпсіздігін қамтамасыз ету мәселелері де ерекше назарда. Мал иелерінің бақылаусыздығынан жануарлардың қатысуымен болған жол-көлік оқиғалары 30%-ға артқан.

«Заң және тәртіп» қағидаты аясында тұрмыстық зорлық-зомбылық пен мас күйінде жасалатын қылмыстардың алдын алу, есепте тұрған тұлғалармен профилактикалық жұмыс күшейтілді.

— Нақты аналитикалық деректердің болуы басқарушылық шешімдерді нысаналы қабылдауға берік негіз қалыптастырып, басымдықтарды уақтылы түзетуге және бөлімдер жұмысының тиімділігін арттыруға мүмкіндік береді, — деп атап өтті ПД бастығы.

Кеңес қорытындысында Ішкі істер министрінің орынбасары профилактикалық жұмысты одан әрі күшейту қажеттігін айтып, полиция қызметкерлерін анықталған кемшіліктерді жоюға бағыттады.