Балабақшадағы тәрбие – болашақ тұлғаның іргетасы. Мұнда бүлдіршіндер айналасындағы адамдармен қарым-қатынас орнатуды, ортақ тәртіпті сақтауды, өз ойын еркін жеткізуді үйренеді. Сондай-ақ педагогтар балалардың бойына отансүйгіштік, мейірім, еңбексүйгіштік, сыпайылық сияқты асыл қасиеттерді сіңіруге ерекше назар аударады.

Облысымыздағы мектепке дейінгі ұйымдарда қазіргі заман талаптарына сай оқу-тәрбие процесі жүйелі түрде жүргізілуде. Тәрбиешілер мен педагог мамандар әр баланың қабілеті мен қызығушылығын ескере отырып, жеке көзқараспен жұмыс істеуді дәстүрге айналдырған. Олардың басты мақсаты – баланың тұлғалық дамуына қолайлы орта қалыптастыру.

Тәрбиешінің еңбегі – ерекше құрметке лайық. Себебі олар баланың өмірге көзқарасын қалыптастырып, жақсы мен жаманды айыра білуге баулиды. Әрбір айтқан жылы сөзі мен қамқорлығы арқылы баланың жүрегіне ізгілік дәнін себеді.

Сондай-ақ бала тәрбиесінде ата-анамен тығыз байланыс орнатудың маңызы зор. Отбасы мен балабақша ынтымақтастығының нәтижесінде балаға берілетін тәлім-тәрбие толыққанды әрі жүйелі сипат алады. Бұл өз кезегінде бүлдіршіннің мектепке және қоғамға бейімделуін жеңілдетеді.

Балабақша – тек білім мен тәрбие беретін мекеме емес, ол – ұлт болашағын тәрбиелейтін қасиетті орда. Ертеңгі ел тізгінін ұстайтын азаматтардың рухани және адамгершілік негізі дәл осы ортада қаланады.

Aлия ҚАЗЫБАЕВА,

N23 «Жас дәурен» бөбекжай-бақшасының тәрбиешісі,

Тараз қаласы