Талдықорғандық команданың жаттықтырушысы Самат Смақов жеңілісті мойындап, жауапкершілікті өзіне алды. Оның айтуынша, матчтан кейін пікір білдіру оңай болған жоқ. Ол тактикалық жоспардың дұрыс таңдалмауы мен қорғаныстағы өрескел қателіктер жеңіліске әкелгенін мойындады. Бапкердің сөзінше, бұл ойында «Қайрат» айқын басымдық танытып, қарсыласты ойсырата жеңді. Сондай-ақ Смақов алматылықтарды қазіргі таңда Қазақстандағы ең мықты команда деп бағалады.

Ал «Қайраттың» бас бапкері Рафаэль Уразбахтин қақпашыларға сыйлыққа беріліп жатқан көліктерге байланысты пікір білдірді.

– «Футбол – командалық ойын. Бір ойыншыны бөліп көрсету дұрыс емес. Егер шынымен қолдау көрсеткісі келсе, бәріне бірдей берсін немесе клубқа көмектессін», – деді ол.

Еске сала кетейік, Чемпиондар лигасында ерекше ойынымен көзге түскен қақпашылар Шерхан Қалмұрза мен Темірлан Анарбеков кәсіпкерлерден автокөлік алған болатын.

Алдағы уақытта «Қайрат» 21 қазанда Чемпиондар лигасында «Пафоспен», 26 қазанда ҚПЛ аясында «Астанамен» кездеседі.