Әділет департаментінің қызмет бағыттарының бірі -  нотариустардың, адвокаттардың, жеке сот орындаушылардың, заң кеңесшілерінің қызметтеріне әдістемелік сүйемелдеуді жүргізу. Мәселен, биыл есепті кезеңде облыс адвокаттарының жалпы саны 263-ке жетіп, 1 адвокаттың лицензиясы тоқтатылған. Ал мемлекет кепілдік берген заң көмегі аясында 114 адвокатпен, 43 заң консультанттарымен кепілдендірілген заң көмегін көрсету туралы келісім жасалған. Департамент басшысының айтуынша, «Адвокаттармен заң көмегін көрсету» бюджеттік бағдарламасы бойынша 170 миллион теңге бөлініп, 77 миллион 800 мың 775 теңгесі игерілген.

– Бюджеттік бағдарламаны іске асыру шеңберінде соттар, тергеу және анықтау органдары 3 695 қаулы шығарды. Заңда көзделген жағдайлар бойынша тегін заң көмегі көрсетілген азаматтардың саны 9 738 адамды құрады.

Осы жылдың 1 қаңтары мен 30 шілдесі аралығында облыс бойынша «Е-заң көмегі» ақпараттық жүйесі арқылы электрондық форматта адвокатты қорғаушы ретінде тағайындауға құқық қорғау органдарынан 579 сұраныс келіп түскен болатын. Оның ішінде 420 сұраныс бойынша адвокат тағайындалған.

Облыста 207 нотариус жұмыс істейді. Жыл басынан бері нотариустармен 24 534 нотариаттық іс-әрекеттер жасалды. Бюджетке аударылған 10 пайыздық сома ретінде 59 миллион 928 мың 268 тенге аударылды. Жалпы, бір нотариустың орташа айлық жүктемесі 197 нотариаттық іс-әрекетті құрайды.

Қаржы мониторингі агенттігіне хабарламаның уақытылы хабарланбағандығына байланысты, департамент тарапынан Қазақстан Республикасының қылмыстық жолмен алынған кірістерді заңдастыруға (жылыстатуға) және терроризмді қаржыландыруға қарсы іс-қимыл туралы заңнамасын бұзу фактісі бойынша 4 хаттама толтырылып, 629 мың  120 теңге қысқартылған тәртіппен төленді.

Осы жылдың 7 айында облыстық әділет департаментіне тауар және  қызмет көрсету белгілерін, географиялық нұсқамаларды және тауар шығарылған жерлердің атауларын заңсыз пайдалану фактісі бойынша 6 өтініш келіп түсіп, 4 жоспардан тыс тексеру жұмыстары жүргізілді. Нәтижесінде ҚР Әкімшілік құқық бұзушылық туралы Кодексінің 158 бабы бойынша 4 әкімшілік өндіріс қозғалды. Заңсыз айналымнан жалпы сомасы 516 мың 500 теңгені құрайтын 122 дана контрафактілік өнімдер алынды. Қазіргі уақытта 4 әкімшілік істі сот қарап, жалпы соммасы 365 мың 686 теңге көлеміндегі айыппұл салу арқылы әкімшілік жауапкершілікке тарту және жалпы сомасы 516 500 теңгені құрайтын 122 дана контрафактілік өнімдерді тәркілеу туралы қаулы шығарылды,– дейді Нұрғали Есіркепұлы.

Сонымен қатар департамент басшысы облыста 15 мемлекеттік сот орындаушысы, 80 жеке сот орындаушысы қызмет атқарып жатқанын айтып өтті. Бүгінгі күнге дейін олар 457 мың атқарушылық іс жүргізген.

Тағы да бір айта кетер жайт, биыл маусым айынан бастап Қазақстан Республикасы Әділет министрлігінің «Әділет» ақпараттық-құқықтық жүйесінде «Цифрлық көмекші» чат-боты іске қосылды. Кез келген құқықтық сұраққа онлайн режимде жауап алуға мүмкіндік беретін бұл чат-бот жасанды интеллектке негізделген. Сондай-ақ бұл чат-бот қойылған сұрақтар бойынша заңнамалық актілердің нормаларына сілтеме береді екен.

Мұқағали БАЛТАБАЕВ