Қазақстан биылғы FIRST GLOBAL халықаралық робототехника чемпионатына бұрын-соңды болмаған ауқымда – бірден 7 командамен қатысуда. Бұл туралы ҚР Оқу-ағарту министрлігінің баспасөз қызметі мәлімдеді.

Чемпионат биыл 110 елден келген 50 мыңнан астам жас инженер мен өнертапқышты біріктірді. 2025 жылғы маусымның тақырыбы — суасты әлемін зерттеу және қорғау.

Министрліктің мәліметінше, жарысқа қатысып жатқан ең жас үміткердің жасы — небәрі 6 жаста.

Қазақстан атынан қатысып жатқан командалар:

Atlantis — «Сатурн» мектебі, Павлодар қаласы

PID және Cristabol — Назарбаев зияткерлік мектебі, Алматы қаласы

Skillset — «Skillset» мектебі, Астана қаласы

JelToqSun және Rasslexx — «Мұрагер» мектебі, Қарағанды қаласы

Sana team — «Білім-инновация» лицей-интернаты, Алматы қаласы

Ұлттық құраманың іріктеуі Орталық Азия чемпионаты — Almaty Tech Cup нәтижесінде жүргізілген.

USTEM Foundation қоғамдық қорының жетекшісі Асылбек Мурзахметов:
«Біздің командалар — маусымның басты фавориттері. Қазақстанның қоржынына тағы да жүлделер мен жеңістер қосылады деп үміттенеміз», — деп атап өтті.

Айта кетейік, Қазақстан бұған дейін Женева (2022), Сингапур (2023) және Афина (2024) қалаларында өткен FIRST GLOBAL чемпионаттарында үш мәрте жеңімпаз атанған.