Басқосуға қатысушылар өткен жылғы көктемгі және күзгі әскерге шақыру науқандарын қорытындылап, 2025 жылғы науқанды өткізу мәселелерін талқылады.

Өткен жылы облысымыз ҚР Қарулы Күштері және басқа да әскери құрылымдарды толықтыру жөніндегі жоспарды сәтті орындады. Былтыр көктемгі және күзгі шақырулар кезінде облыс бойынша 3 000-нан астам жас әскерге аттанып, жоспар артығымен орындалған екен.

Жиында Нұржан Календеров әскерге шақыруды ұйымдастыруда үздік көрсеткішке қол жеткізген аудандарды атап өтті. Былтыр подполковник Ербол Өтебаев басқаратын Тараз қалалық қорғаныс істері басқармасы әскери науқанды өткізу бойынша ең жоғары нәтиже көрсеткен. Бұл көрсеткіш бойынша екінші орында Меркі ауданы тұрса, үздік үштікті Шу ауданы түйіндепті.

Әскерді дайын кадрлармен қамтамасыз ету мемлекет алдында тұрған жауапты міндеттердің бірі. Осыны еске салған Нұржан Сәбитұлы әскерге шақыру науқанын ойдағыдай өткізу үшін үйлесімді жұмыс істеу керектігін жеткізді.

Қатысушылар көктемгі шақыруды өткізу барысында медициналық тексеру сапасы, құқықтық қолдау және ведомстволар арасындағы ынтымақтастық мәселелеріне назар аударды. Сонымен қатар, шақыру шараларының ашықтығы мен уақытында өткізілуі керектігі айтылды.

Облыстық қорғаныс істері департаментінің бастығы, полковник Нұрбол Зейнелов көктемгі шақырудың жоғары деңгейде ұйымдастырылатынына сенім білдірді.

Айта кетейік, көктемгі әскерге шақыру науқаны 2025 жылдың 1 наурызында басталды. Биыл облыстан 18 бен 27 жас аралығындағы 1 700 азаматты Қарулы Күштерге шақыру жоспарланған.