ҚР Денсаулық сақтау министрлігі Apple компаниясының өкілдерімен сәтті келіссөздер жүргізді,соның нәтижесінде Қазақстанда денсаулық мониторингі үшін маңызды цифрлық сервистер қолжетімді болды.

Бұған дейін бұл қызметтер тек АҚШ, Канада, Германия, Ұлыбритания және Аустралия сияқты елдерде ғана жұмыс істеген. Енді қазақстандықтар өз денсаулығын бақылау үшін осы технологияларды пайдалана алады.

Apple Watch-та ЭКГ жазу мүмкіндігі
Apple Watch Series 6 және одан кейінгі модельдерінде электрокардиограмма (ЭКГ) жазу функциясы іске қосылды. Ол жүрек ырғағын 30 секунд ішінде тексеріп, жүрекшелер фибрилляциясын анықтауға көмектеседі.

Ұйқы кезіндегі апноэны анықтау
Apple Watch Series 9 және одан кейінгі үлгілерінде ұйықтау кезіндегі апноэ эпизодтарын тіркеу функциясы қосылды. Бұл мүмкіндік түнгі тыныс алу бұзылыстарын анықтап, пайдаланушыларға хабарлама жіберуді қарастырады.

AirPods Pro-дағы жаңа функциялар
AirPods Pro 2 және одан кейінгі нұсқаларында «Естуді тексеру» және «Есту аппараты» функциялары іске қосылды. Жаңа технологиялар есту қабілетін тексеріп, жеңіл және орташа дәрежедегі есту қабілеті бұзылған адамдарға дыбысты жеке қажеттіліктеріне бейімдеуге мүмкіндік береді.

Бұл функциялар медициналық диагноз қою немесе емдеу үшін арналмаған. Олар денсаулық жағдайын бақылауға арналған көмекші құрал ретінде қарастырылады.

Қазақстан Республикасының Денсаулық сақтау министрлігі заманауи технологияларды енгізу арқылы халықтың әл-ауқатын жақсарту бағытында жұмыстарды жалғастыруда.