Қазақстанды білім орталығы ретінде танытуға ықпал ететін маңызды алаң саналатын бұл іс-шара жыл сайын дәстүрлі түрде ұйымдастырылып келеді. Форумның басты мақсаты – Қазақстандағы білім беру мүмкіндіктерін таныстыру, студенттердің тәжірибе алмасуына жағдай жасау және ғылыми-зерттеу жобаларын дамытуға қолдау көрсету.

Республикалық деңгейдегі маңызды жиынға М.Х.Дулати атындағы Тараз университетінің студенттері де қатысатын болды. Жақында форумға қатысатын жастарды іріктеу мақсатында оқу орнында арнайы байқау өткізіліп, білімділігімен, зерттеу жұмыстарының жаңашылдығымен көзге түскен талантты жастар анықталды.

Байқауға қатысушылар Қазақстан мен Өзбекстан арасындағы білім беру экожүйесі, Қазақстан мен Түрікменстан арасындағы телемедицина және денсаулық мониторингі жүйесі, Қазақстан мен Қытай арасындағы экспорт/импорт смарт-калькуляторы секілді өзекті тақырыптар бойынша жобаларын ұсынып, сарапшылар алдында қорғады.

Комиссия мүшелері ғылыми негіздемесі мықты, тәжірибеде қолдануға болатын үздік жобаларды таңдап, жеңімпаз студенттерді анықтады. Байқау нәтижесі бойынша форумға Албина Сәбитова, Жансұлу Жийемұратова, Гүлсина Базарбаева және Ширинхон Пулатова жолдама алды.

Форумға дайындалып жатқан студенттердің бірі Гүлсина Базарбаева іс-шараның маңызы туралы өз ойымен бөлісті. Оның айтуынша, бұл форум тек ғылыми жобаларды қорғаумен шектелмейді, сондай-ақ студенттердің өзара тәжірибе алмасып, жаңа байланыстар орнатуына мүмкіндік береді.

– Бұл форум мен үшін үлкен мүмкіндік. Мұнда біз өз жобамызды тек ғылыми тұрғыдан ғана емес, практикалық тұрғыдан да көрсетуге тырысамыз. Қатысушылармен танысып, олардың идеяларымен танысу, өңіріміздің білім беру жүйесінің артықшылықтарын көрсету – біз үшін зор мәртебе – дейді Г.Базарбаева.

А.БЕКЕНҚЫЗЫ