Форумның басты мақсаты – оқушыларды болашақ кәсіптермен таныстыру, еңбек нарығындағы қажетті мамандықтарды таңдауға бағыт-бағдар беру, жұмысшы мамандықтарының қоғамдағы маңыздылығын көрсету. Іс-шараға бірнеше колледж өкілі қатысып, мамандықтар туралы жан-жақты ақпарат ұсынды.

Форум барысында мектеп директорының бағдарлы ісі жөніндегі орынбасары Айгүл Жолдасбекова баяндама жасап, мамандық таңдаудың маңыздылығы, еңбек нарығындағы жаңа мүмкіндіктер және сұранысқа ие мамандықтар туралы ой қозғады. Сонымен қатар 10-сынып оқушылары жұмысшы мамандықтар бойынша таныстырылым жасады. Колледж мамандары арнайы әзірлеген презентацияларын ұсынып, оқушылармен сұхбат жүргізді. Оқушылар да белсенділік танытып, мамандықтар туралы өздерін толғандырған сұрақтарын қойып, колледж өкілдерімен пікір алмасты.

Іс-шараның тағы бір ерекшелігі – жұмысшы мамандықтар бойынша киім үлгісіндегі оқушылардың көрмесі болды. Бұл көрме оқушыларға тек теория жүзінде емес, практикалық тұрғыдан да жұмысшы мамандықтарының қыр-сырын түсінуге мүмкіндік берді. Әртүрлі саладағы мамандықтар бейнеленген көрме қатысушылардың қызығушылығын арттырып, болашақ мамандық таңдауына әсер етті.

Іс-шараның жоғары деңгейде ұйымдастырылуына мектеп ұстаздары – Анар Үсембаева, Жексенкүл Серікбаева, Клара Қалданова, Алмаш Ыдырысова және Гүлнар Мержанова өз үлестерін қосты.

Мамандық таңдау – адамның болашақ тағдырына тікелей әсер ететін маңызды шешім. Осындай іс-шаралар оқушыларға кәсіби бағдар беруде үлкен рөл атқарады.

Анар ҮСЕМБАЕВА,
Н. Киікбаев атындағы
мектеп-гимназияның химия пәнінің мұғалімі,
Байзақ ауданы