Ақорданың мәлімдеуінше,Жеделхатта Президент Төлен Әбдіктің сұхбатындағы ой-толғамдарды жоғары бағалап, оның ұлттық руханиятқа қосқан үлесін атап өтті. Қасым-Жомарт Тоқаев әдебиетіміздің дамуына қатысты айтылған сын-пікірлер мен жас ұрпаққа берген ақыл-кеңестерін орынды деп санайтынын білдірді.

– «Егемен Қазақстан» газетіне берген сұхбатыңызды мұқият оқып шықтым. Өзекті ой-толғамдарыңыз арқылы ұлт руханияты үшін құнды дүниелер айтылған. Төл әдебиетіміздің даму көкжиегіне қатысты сын-пікірлеріңіз бен жас буынға қарата айтқан ақыл-кеңестеріңіз орынды деп санаймын. Шын мәнінде, жаһанды жайлаған қазіргідей құбылмалы заманда жазушылар қауымы көркем туындылары арқылы әділдік, жақсылық және адамдық құндылықтарын кеңінен дәріптегені жөн. Бұл еліміздің келешегі үшін өте маңызды. Қаламыңыз қарымды болсын! Сізге мықты денсаулық, бақ-береке және толайым табыс тілеймін! », – деп жазды мемлекет басшысы.