Әулиеата өңірінде ұлттық өнер мен шығыс шайырларының шығармашылық мұрасы үндескен ерекше кеш өтті. Жыр мен әннің үйлесімі арқылы көпшілік рухани ләззат алып, әдебиет пен мәдениет саласындағы үздік шығармашылық туындыларға құрмет көрсетілді.

– Өткеннің өнегесі, бүгінгі күннің сырлы бояулары әдеби шығармаларда жатқаны сөзсіз. Осы тұрғыда әдебиет пен мәдениетті қолдау – мемлекетіміздің негізгі бағыттарының бірі. Жыр алыбы Жамбыл Жабаевтың есімі берілген біздің өңірде де бұл бағытта ауқымды жобалар, маңызды іс-шаралар қолға алынуда, – деген облыс әкімі «Асқақ рухты Әулиеата» атты республикалық әдеби-мәдени байқауының жүлдегерлерін марапаттады.

Атап айтқанда, «Поэзия» номинациясы бойынша К. Әзірбаев пен Ж. Жабаев атындағы жүлде қос ақын Нұржан Қуантай мен Ерлан Жүніске берілді.

Жазушы Болатбек Төлепберген «Проза» номинациясы бойынша Б. Момышұлы атындағы, жазушы, драматург Нұрғали Ораз «Проза» және «Көркем аударма» номинациясы бойынша Ш. Мұртаза атындағы, журналист, сатирик Бақытжан Әлімқұлов «Сатира жанры» номинациясы бойынша Ш. Смаханұлы атындағы, жазушы Ырысбек Дәбей «Проза» номинациясы бойынша Н. Дәутайұлы атындағы, ақын, драматург Иранбек Оразбаев «Драматургия» номинациясы бойынша А. Бекбосын атындағы жүлдеге ие болды. Сонымен бірге «Жыр-терме» номинациясы бойынша Ә. Желдібаев пен А. Бетбаев атындағы жүлдені ақын, сазгер Жанатбек Тұрғымбай мен ақын Бауыржан Жақып еншіледі.

Жеңімпаздарға арнайы дипломдар мен 1 миллион теңге көлемінде қаржылай сертификаттар табысталды.