Бастама шеңберінде еліміздің барлық мектептерінде қақтығыстарды тиімді шешуге және оқушылар, педагогтер мен ата-аналар үшін жағымсыз салдардың алдын алуға ықпал ететін мектеп медиациясы қызметтері жұмыс атқара бастайды.

Медиация қызметінің жұмысын біріздендіру үшін Ы.Алтынсарин атындағы Ұлттық білім академиясы арнайы әдістемелік ұсынымдар әзірледі. Бұл құжаттар мектеп медиациясын ұйымдастыруға қажетті теориялық және практикалық материалдарды қамтып, білім беру ұйымдарында медиативтік тәсілдерді енгізудің негізін қалайды.

"Басты мақсат – балаларды дамытуға және әлеуметтендіруге қолайлы әрі қауіпсіз орта құру, сондай-ақ қиын өмірлік жағдайларда көмек көрсету. Сонымен қатар, отбасылық-құқықтық дауларды шешуге жәрдемдесу қарастырылған. Медиация қызметі қақтығыстарды реттеудің маңызды құралы болып табылады және даулы жағдайларды азайтып, оқу орындарындағы психологиялық ахуалды жақсартуға мүмкіндік береді," – деп атап өтті ҚР Оқу-ағарту министрлігі Балалардың құқықтарын қорғау комитетінің төрағасы Насымжан Оспанова.

Медиация қызметіне жоғары сынып оқушылары, педагогтер, педагог-психологтар, әлеуметтік педагогтер, ата-аналар, сондай-ақ үкіметтік емес ұйымдардың, қамқоршылық кеңестердің және аға ұрпақ өкілдері қатысады.