Өңірлік геоақпараттық жүйені құрудың негізгі мақсаты – инновациялық тәсілдерді енгізу арқылы қала тұрғындарының тұрғын үй-коммуналдық сектор ұйымдарының қызметтерін алуын жеңілдету. Жобаның басты міндеттері қызметті автоматтандыру, тұрғындардың уақытын үнемдеу және бюрократиялық кедергілерді азайту, қағазбастылықты жою, сыбайлас жемқорлық тәуекелдерін төмендету. «E-JAMBYL.KZ» платформасы арқылы қызметтерді онлайн режимінде, кез келген уақытта және кез келген жерде алуға болады. Тұрғындар меншік иесін қайта рәсімдеу, шоттар ашу, тұрғындар санын өзгерту, заңды тұлғалармен шарт жасасуға өтініштер жіберу секілді қызметтерді пайдалана алады. Жүйе арқылы тұрғындар кезек күтпей, уақыт жоғалтпай, барлық операцияларды тез әрі тиімді жүргізе алады. Өтініштер туралы ақпарат бір жерде қолжетімді, бұл құжаттарды жоғалту немесе басқа да түсініспеушіліктердің алдын алады.

– «E-JAMBYL.KZ» платформасының тағы бір бағыты – «Отбасы Банкі» акционерлік қоғамымен бірлесіп жүзеге асырылатын «Әулиеата жастары» өңірлік тұрғын үй бағдарламасы аясында облыс жастарына жеңілдікпен несие беруді қарастырады. 2022 жылы 41, ал 2023 жылы 144 қатысушы баспаналы болды. 2024 жылдың 1 қазанынан бастап бағдарламаның үшінші кезеңі іске қосылды. Жер учаскелері бойынша тұрғындар үшін «Ашық карта» сервисі ұсынылған, онда 124 картографиялық қабат бар. Атап айтқанда, облыстың, елді мекендердің шекарасы, бос жер учаскелері, бас жоспарлар, қызыл сызықтар, функционалдық аймақтар және ғимараттар мен құрылыстар көрсетілген. Сайлау науқаны кезінде тұрғындар ЖСН енгізу арқылы өз сайлау учаскелерін анықтай алатын онлайн қызмет те іске асырылды. Бұл тұрғындарға сайлау процесіне қатысуды жеңілдетеді, – дейді облыстық жобалық басқару және цифрландыру орталығының директоры Гүлпара Тәшенова.

Геопорталда сәулет және қала құрылысы саласында 6, жер қатынастары саласында 8 мемлекеттік қызмет автоматтандырылып, енгізілді. Сәулет қала құрылысы бойынша ұсынылатын қызметтерге эскизді келісуден өткізу, құрылыс жобаларын әзірлеу кезінде бастапқы материалдарды ұсыну, жылжымайтын мүлік мекенжайын н а қ т ы л а у т у р а л ы а н ы қ т а м а , объектілерді кәдеге жаратуға рұқсат беру, ғибадат үйлерін салу туралы шешім, ғибадат үйлерін қайта бейіндеу жатады. Жер қатынастары бойынша автоматтандырылған қызметтерге жер учаскелерін қалыптастыру жобаларын бекіту, жер учаскесін жекеменшікке сату, жер учаскесінің нысаналы мақсатын өзгертуге шешім беру, мемлекет меншігіндегі жер учаскелеріне құқықтарды алу, іздестіру жұмыстарына рұқсат беру, жер учаскелерінің бөлінетіндігі мен бөлінбейтіндігін айқындау, бүлінген жерлерді қалпына келтіру жобасын келісу, жер учаскесінің жалдау мерзімін ұзарту жатады.

Биылғы жылдың қыркүйек айынан бастап геопорталда Тараз қаласы жер қатынастары бөлімінің мемлекеттік қызметтері, атап айтқанда, «Жер учаскесінің жалдау мерзімін ұзарту» және «Жер учаскесін жекеменшікке сату» жүзеге асырылуда. Аталған мемлекеттік қызметтер бойынша 75-ке жуық өтінім қабылданып, жауапты мамандар тарапынан өңделуде. «E-JAMBYL. KZ» жобасы тұрғындарға мемлекеттік қызметтерді алу процесін жеңілдетіп, уақытты үнемдеуге, бюрократиялық кедергілерді жоюға және азаматтармен қарым-қатынасты жақсартуға мүмкіндік береді. Бұл бастама қала тұрғындарының өмірін сапалы түрде жақсартуға бағытталған маңызды қадам.

Одан бөлек жоба әкімдік қызметтерінің ашықтығын және есептілігін арттыруға көмектеседі. Платформа арқылы тұрғындар қызмет көрсету сапасы мен мерзімдері туралы кері байланыс қалдыра алады, бұл әкімдікке қызмет көрсетуді жетілдіруге мүмкіндік береді.

Платформаның тағы бір маңызды артықшылығы – бұл оның пайдаланушы достығы. Жоба аясында әзірленген интерфейс өте түсінікті және жеңіл, тұрғындар үшін барлық қызметті алу процесі оңайлатылған.

Жамбыл облысынан өзге облыстарда д а «E-JAMBYL.KZ» жобасының аналогтары іске асырылуда. Мысалы, Астана, Алматы, Шымкент қалаларында д а «SmartCity» концепциясы негізінде коммуналдық қызметтерді автоматтандыру жобалары қолға алынған. Бұл жобалардың басты мақсаты – тұрғындарға мемлекеттік қызметтерді жеңілдету, қала инфрақұрылымын тиімді басқару және тұрғындармен диалогты жақсарту.

Сондай-ақ басқа облыстардағы жобаларда да әр түрлі қызмет түрлерін бір платформада біріктіру, электрондық өтініштерді қабылдау, қызмет көрсету мерзімдерін қысқарту, тұрғындардың әкімдікпен байланысын жеңілдету мақсатында заманауи технологиялар қолданылады. Мысалы, мобильді қосымшалар арқылы тұрғындар өздеріне қажетті қызметтерді үйден шықпай-ақ ала алады, сондай-ақ өтініштерін бақылап, статусын тексеруіне болады.

Сонымен қатар «SmartCity» жобаларының аясында қала тұрғындарының пікірлері мен ұсыныстарын ескеріп, қоғамдық қатынастарды жақсартуға бағытталған шаралар қолға алынуда. Тұрғындардың белсенділігі мен ынтымақтастығы арқылы әкімдік қызметтерінің сапасы артып, қалада тұратын адамдардың өмірі оңтайланады.

Нәтижесінде «E-JAMBYL.KZ» жобасы қала тұрғындары мен әкімдік арасындағы байланыстарды нығайтып, тұрғындардың өмірін жеңілдетуге бағытталған инновациялық шешімдердің бірі болып табылады. Бұл жоба еліміздегі басқа облыстарға да үлгі болып, тұрғындарға мемлекеттік қызметтерді автоматтандырудың тиімділігін көрсетуде.

Айжан ӨЗБЕКОВА