Айталық, қаланы дамытудың 3 жылдық жоспарында шаһар бойынша 24 шағын футбол алаңшасын салу қажеттілігі туындаған болатын. Соған орай биыл облыс орталығында 9 алаңша ел игілігіне берілмек. Қазіргі таңда «Қарасу» (5) ықшамауданы, №12, 15, 16 үйлердің ауласында бой көтеріп жатқан футбол алаңшасының құрылысы толығымен аяқталды. Қалған 8 нысанның да құрылысы таяу уақытта тәмамдалады деп көзделуде.

Соған орай Тараз қаласының әкімі Бақытжан Орынбеков «Қарасу» шағын ауданы, №16 үйдің маңында бой көтерген спорт алаңшасының құрылысын көріп, тұрғындармен тілдесті.

– Биыл қалада тоғыз спорт алаңшасы пайдалануға беріледі. Сәтін салса жоспарды толықтай орындаймыз. Алайда осы салынған дүниелерді күтіп ұстау деген мәселе бар. Бұл жұмыстарға тұрғындар жауапкершілік танытуы керек. Сондықтан әрбір аумақта мүлік иелерінің бірлестігін (МИБ) құру маңызды. Алдағы уақытта мұндай бірлестіктер құрылмаған аумақтарда спорт алаңшаларын салу қарастырылмайды. Бұл бір жағынан тұрғындардың ортақ мүлкіне немқұрайлы қарамауы үшін де қажет, – деген Бақытжан Әмірбекұлы 2025 жылы шаһарда 10, 2026 жылы 5 шағын футбол алаңшасын ашылу көзделіп отырғанын жеткізді.

Бұдан бөлек, биыл қала аумағында 14 спорт алаңшасы қалпына келтіріліп, жаңа кейіпке енеді. Осылайша, биыл жыл соңына дейін тұрғындар жаңа шағын футбол алаңшаларының игілігін көреді.

Қала әкімі шаһардағы құрылысы жүріп жатқан ойын алаңшаларының да сапасын тексерді. «Ақбұлақ» шағын ауданындағы жетінші үйдің ауласындағы «Проект и К» ЖШС мердігерлігімен соғылған ойын алаңшасына аялдаған Бақытжан Әмірбекұлы жауаптыларға барынша сапаға мән беру қажеттігін айтты.

Жалпы биыл Тараз қаласы бойынша 25 ойын алаңшасының құрылысы жүрсе, былтыр 26 ойын алаңшасы пайдалануға берілген болатын.