Өткенге аз-кем шегініс жасасақ, 2010 жылы елімізде небәрі 73,4 мың кәсіпкер әйел (жалпы кәсіпкерлердің 26 пайызы) тіркелген. Ал бүгінде бизнес, қаржы және экономика саласында жетекшілік етіп отырған әйелдер шағын және орта бизнес (ШОБ) субъектілерінде 1 миллион адамнан асып отыр. Тұтастай алғанда, әйелдердің экономикалық белсенділігінің деңгейі 63,7 пайызды құрайды.

Облысымызда да әйелдер кәсіпкерлігі жыл санап қанатын кеңге жайып келеді. Өңіріміздің түкпір-түкпірінде кәсіпкерлік саласының көкжиегін кеңейтіп, жүздеген, мыңдаған адамды тұрақты жұмыспен қамтып, тірлігін дөңгелетіп отырған қыз-келіншектер аз емес. Мәселен, Мойынқұм ауылының тұрғыны Диана Мұхтарова да көпке үлгі болар тірлік істеп, бүгінде айына 1 миллион теңге табыс тауып отыр.

 Жастайынан қолөнерге жақын болып өскен Диана мектеп бітіргеннен кейін М.Х.Дулати атындағы Тараз өңірлік университетіне «Дизайн» мамандығы бойынша оқуға түседі. Десе де Диана ата-анасының қалауымен екінші курстан бастап басқа мамандық бойынша білім алады.

Бірақ мамандығы ауысқанымен жүрек қалауы өзгерген жоқ. Өздігінше білімін жетілдіріп, тігін өнерінің қыр-сырын меңгере түседі. – Бала арманымды келін болып түскен Мойынқұм ауылында жүзеге асырдым. Ата-енем, жолдасым үлкен қолдау көрсетіп, ауылдан перде салонын ашып берді. Анам да қолдан келген көмегін аяп қалған жоқ. 

Осылайша бүгінде шағын бизнесімді дөңгелетіп отырған жайым бар. Уақыт өткен сайын тұтынушылардың да қатары артып келеді. Тапсырыс берушінің талғамы мен таңдауына сай перде тігіп беру, көпшіліктің көңілінен шығып, алғысын алу – басты арманым, – деген Диана Қанатқызы алдағы уақытта облыс орталығы Тараз қаласынан, Астана қаласынан перде салонын ашуды армандайтынын жеткізді. 

Талабы таудай, арман асқақ Диананың берекелі бизнесіне табыс тілеп, мақсат-мұраттарына жете беруіне тілектестік білдірдік. 

Ділназ ИЗАТІЛДА,
М.Х.Дулати атындағы
Тараз өңірлік университетінің 
4-курс студенті