Егер пәтерде бөтен адам тіркелсе, мүлік иесі коммуналдық қызметтер үшін көбірек төлейді. Егер "тіркелген" адам қылмыс жасаған болса, құқық қорғау органдары мүлік иесіне сұрақ қоюы мүмкін. Елімізде пәтерге кім тіркелгенін қалай білуге болады және оны тіркеуден қалай шығару керек? Бұл туралы "Ұлттық ақпараттық жүйелер" АҚ өкілдері айтты. 

Тұрғын үйге кім тіркелгенін қалай тексеруге болады?

ЕGov.kz порталы арқылы және eGov mobile қосымшасында тіркелген азаматтардың санын "Профиль" - "Жылжымайтын мүлік" - "Тұрғындар туралы ақпарат" бөлімінде көре аласыз.

Ол үшін ЭЦҚ, QR код немесе логин мен пароль арқылы порталға кіру қажет. Содан кейін жеке кабинетке өтіп, "Меншік" бөлімінде "Тіркелген тұлғалардың тізімін көрсету/жасыру" опциясын таңдайсыз.

Тұрғын үйге заңсыз тіркелген тұрғынды қалай алып тастауға болады?

Егер сіз тұрғын үй иесі болсаңыз, өзіңізде тіркелген азаматты тұрақты немесе уақытша тіркеуден үш жолмен алып тастай аласыз: eGov.kz порталы арқылы, eGov mobile қосымшасы арқылы немесе Халыққа қызмет көрсету орталығына бару арқылы.

ЕGov.kz порталы арқылы:⠀ ⠀

eGgov.kz порталына кіресіз.

"Тіркеуден шығару" қызметін табу үшін іздеу жүйесін қолданыңыз.

Қызметті онлайн алу батырмасын басыңыз.

Мекенжай мәліметтерін тексеріңіз.

Тіркелгендер тізімінен тіркеуден шығарғыңыз келетін адамды таңдаңыз.

Электрондық цифрлық қолтаңбаны пайдаланып қолданбаға қол қойыңыз.

Қызмет нәтижелері порталдағы жеке кабинетте көрсетіледі.

ЕGov mobile қосымшасы арқылы:

ЕGov mobile қосымшасына кіріңіз.

"Қазақстан Республикасы халқының тұрғылықты жері бойынша есептен шығару" қызметін табу үшін іздеу жүйесін қолданыңыз.

Жылжымайтын мүлікті аймақ, мекенжайды тіркеу коды немесе кадастрлық нөмірі бойынша  іздеп, таңдаңыз.

Өтінішті Face ID/Touch ID арқылы растаңыз.

Қызмет нәтижелері "Жеке кабинет тарихы" бөлімінде көрсетіледі.

Мүліктің ортақ иелері болса, олар жеке кабинетте сіздің әрекетіңізді растауы керек.⠀

Сондай-ақ, "Азаматтарға арналған үкімет" мемлекеттік корпорациясы" КЕАҚ филиалдарында, яғни ХҚКО-ларда тіркеуді алып тастауға болады. Халыққа қызмет көрсету орталығы арқылы қызметті қолдану кезінде тіркеуден шығарылатын адамның ЖСН-ін білу қажет.

Тұрғындар көп тіркелген пәтерлер әдетте "созылмалы" деп аталады. Алматы облысында, прокуратура мәліметі бойынша, 12 мыңнан аса шетелдік тіркелген 278 үй анықталған. Кейбір деректер бойынша ҚР Қылмыстық кодексінің 394-бабы ("Заңсыз көші-қонды ұйымдастыру") бойынша қылмыстық іс қозғалған.