Қордай ауданында аквамәдениет табысты дамып келеді. Бүгінде Сортөбе ауылдық округінде қуатты балық шаруашылығы қоры бар. Соның арқасында балық шаруашылығы таяу жылдары аудан экономикасының локомотивіне айналмақ.  Округте аудандық Индустрияландыру картасына енген екі ірі «KordayFish» және «TarazEkoFish» балық шаруашылығы бар. 2020-2025 жылдарға арналған индустриялық-инновациялық даму бағдарламасы аясында кәсіпорындарды одан әрі дамыту үшін мемлекеттік қолдау көрсетіледі. Қазіргі таңда «KordayFish» ЖШС форельдің екі түрін өсіреді – янтарь түсті және түрлі-түсті форель. Шаруа қазір бұлақтан су келетін қоймасының жағасында төрт гектар жерді алып жатыр. Мұнда он бассейн бар. Кәсіпорынның өндірістік қуаттылығы жылына 300 тоннаға дейін болмақ. Биыл 180 тонна балық өсіру жоспарлануда. Ал «TarazEkoFish» ЖШС-де норвегиялық және түрлі-түсті форель, бекіре балықтарын өсіру жобасы өткен жылы қолға алынды. Өндірістің жобалық қуаты жылына 200 тоннаға дейін жетеді деп күтілуде, бұл көрсеткішке 2025 жылға дейін жету жоспарлануда. Шаруашылықта жылдың аяғына дейін 60 тоннадан астам балық өнімі алынбақ.

Облыс әкімінің баспасөз қызметі