Комиссия кәмелетке толмағандарды заңсыз жұмысқа тарту жағдайларын азайту мақсатында ата-аналар мен жұмыс берушілердің жауапкершілігін күшейтудің маңыздылығын атап өтті.

Жамбыл облысында кәмелетке толмағандардың еңбегін заңсыз пайдалану мәселесі талқыланған кезекті комиссия отырысы өтті, деп хабарлайды Qaz365.kz.

Жиында жасөспірімдердің құқықтарын қорғау, олардың қауіпсіздігін қамтамасыз ету және түнгі уақытта жұмыс істеуге тартуға қатысты заң талаптарының сақталуы мәселелері көтерілді.

Жамбыл облысы әкімінің орынбасары Серік Сәлемовтың айтуынша, түнгі уақытта жұмыс істейтін кәмелетке толмағандардың басым бөлігі – студенттер, алайда олардың арасында мектеп оқушылары да бар.

«Жұмыс уақытының кеш аяқталуы жасөспірімдердің құқықбұзушылыққа бару немесе қылмыстың құрбанына айналу қаупін арттырады. Бала қауіпсіздігіне ең алдымен ата-ана жауапты. Сондықтан олар өз баласының қайда, немен айналысып жүргенін бақылауы қажет», – деді ол.

Көбінесе жасөспірімдер кәсіпкерлік нысандарында даяшы болып жұмыс істейді. Балалардың еңбек етуге деген талпынысы болғанымен, барлық жұмыс берушілер Еңбек кодексінің талаптарын орындай бермейді.

Отырыс қорытындысы бойынша уәкілетті органдарға түсіндіру жұмыстарын күшейту, тексеріс жүргізу және кәмелетке толмағандарды түнгі еңбекке тартудың алдын алу бойынша нақты шаралар қабылдау тапсырылды.

«Бұл бағыттағы жұмыс алдағы уақытта тұрақты бақылауда болады. Жасөспірімдердің құқықтары мен қауіпсіздігін қорғау – баршамыздың ортақ міндетіміз. Заңды қатаң сақтау – уақыт талабы», – деп атап өтті Серік Сәлемов.

Сонымен қатар комиссия ата-аналар мен жұмыс берушілердің жауапкершілігін арттыру арқылы жасөспірімдерді заңсыз жұмысқа тарту деректерін азайту қажеттігін баса айтты.