«Жұмысшы жастар аманаты» облыстық жастар форумына Қазақстан Республикасы Парламенті Мәжілісінің депутаты, Қазақстанның Еңбек Ері Мұқаш Ескендіров, облыс әкімінің орынбасары Қанатбек Мәдібек, «AMANAT» партиясы облыстық филиалының төрағасы Дауыл Бейсенқұлов қатысты. Сондай-ақ облыстық мәслихаттың депутаттары, «AMANAT» партиясы жанындағы «Жастар Рухы» Жастар қанатының ұжымы және елімізге танымал еңбек ардагерлері, ірі кәсіпорындар мен өндіріс ошақтарындағы, шаруа қожалықтарындағы жастар мен техникалық және кәсіптік білім беру мекемелерінің студенттері қатысты.

Форум басталмас бұрын LED экраннан жұмысшы мамандықтары мен еңбек адамдары туралы бейнеролик көрсетіліп, жергілікті өнерпаздар  әуелетіп ән шырқады. Сонымен қатар арнайы сахналық қойылым көпшілік назарына ұсынылды.

Салтанатты сәтте алғаш болып сөз алған Мұқаш Зұлқарнайұлы  формуның мән-маңызына, жұмысшы мамандықтарының беделін көтеру мәселесіне  тоқталды.

– Президентіміз Қасым-Жомарт Кемелұлының биылғы жылды «Жұмысшы мамандықтары жылы» деп жариялауы тектен тек емес. Атаулы жыл аясында биыл көптеген іс-шаралар өтіп жатыр.  

Қазақстан қазір экономикасы дамып, өркениет тұғырына құлаш сермеуде. Елімізде көптеген жаңа жобалар жүзеге асырылуда. Мұндай жобалардың жүйелі жүзеге асуына жұмысшы мамандықтарын меңгерген жастардың күш-жігері ауадай қажет.

Мен де алғаш жұмысымды осы өндіріс ошағынан бастап, химия өнеркәсібі саласында еңбек еттім. Мұндағы ардагерлермен де етене араласып, тәлім-тәрбиесін алуға тырыстым. Осындай ұрпақтар сабақтастығы бүгін де жалғасын табуда. Жастардың жұмысшы мамандықтарына қызығушылық танытуы еліміздің өркендеуіне үлес қосуы деп білемін. Қазір қоғамда жұмысшы мамандарға сұраныс артып, еңбектері бағаланып жатыр. Бұл қуанышты жағдай. Себебі еліміздегі көптеген өндіріс ошақтарында шетелдік азаматтар жұмыс істеуде. Солардың орнын алмастыратын буын-жастар. Сондықтан да еліміздің өркендеуі үшін жұмысшы мамандардың, жастардың әлеуетін жоғарылатуымыз тиіс,– деді Мұқаш Зұлқарнайұлы.

Келесі кезекте  облыс әкімінің орынбасары Қанатбек Мәдібек сөз алып, ізгі тілегін арнады.  

– Құрметті форумға қатысушылар, қадірлі ардагерлер! Баршаңызбен бүгінгі «Жұмысшы жастар аманаты» облыстық жастар форумында жүздескеніме қуаныштымын. Бұл форум адал еңбегімен қоғамның дамуына зор үлес қосып жүрген барша мамандарға көрсетілген үлкен құрмет.

Мемлекет басшысы Қасым-Жомарт Тоқаев «Жұмысшы мамандықтарын дәріптеу арқылы қоғамда еңбекқор және нағыз маман болу идеясын насихаттаймыз», – деді. Бұл еңбек адамын алға шығарып, оның беделін арттыруға жасалған бастаманың бірі. Адам капиталы мемлекеттің ең басты құндылығы болса, еңбек адамдары адал еңбегімен, табандылығымен үлгі болатын қоғамның нағыз қаһармандары. Олар  қай салада болсын елдің дамуына зор үлес қосып жүр. Кәсіби маман - өз ісіне адал, заман талабына сай білімін терең ұштастыратын тұлға. Бүгінгі облыстық жастар форумы нағыз еңбек адамдарын насихаттап, қоғамдағы жұмысшы мамандықтарына деген сұранысты арттыруға бағытталып отыр.

Қазіргі уақытта облысымызда жиырмадан астам инвестициялық жобалар жүзеге асып жатқан болса, алдағы уақытта алпыс екі осындай ірі жобаларды іске асырамыз деп жоспарлап отырмыз. Бұл шамамен 6 мыңнан астам жаңа жұмыс орындарының ашылуына сеп болады. Сол себепті жастар өз мамандықтары бойынша осы жұмыс орындарында еңбек етеді деп сенеміз,– деді Қанатбек Қайшыбекұлы.

Басқосу барысында сөз сөйлеген «Минералды тыңайтқыштар зауытының» инженері, жас маман Қайсар Алдахметов отбасы болып жұмысшы мамандығын меңгергендерін, өзінің  әке жолын жалғап жүргенін жеткізді. Сол сияқты «Жамбыл локомотив пайдалану» депосының қауіпсіздік және еңбекті қорғау секторының бастығы Әділет Түлеков бөлімшенің қызметтік бағыттарын айтып өтті.

Ал «Тalas Investment Company» жауапкершілігі шектеулі серіктестігінің жас маманы Бексұлтан Оразбекұлы еңбек адамы болу үлкен мәртебе екенін айтып, өндіріс ошағының жұмысы мен алдағы жоспарларына тоқталды. Аталмыш компания– еліміздегі натрий цианидін өндіретін жалғыз кәсіпорын. Мұнда өндірістік процестер аккредиттелген зертханада тұрақты бақылауда ұсталып, өнім сапасы жоғары деңгейде қамтамасыз етіледі. Бүгінде натрий цианидіне деген сұраныс едәуір артып, осыған орай, зауыт базасында екінші өндірістік желінің құрылысы басталған. Жоба толық жүзеге асқан жағдайда кәсіпорын жылына 30 мың тонна натрий цианиді мен 10 мың тонна аммоний сульфатын өндіретін болады. Жоба технологиялық процесті басқарудың автоматтандырылған жүйелерінің соңғы жетістіктеріне негізделіп, толық цифрландырылған түрде жүзеге асырылады. Құрылысқа 25,8 миллиард теңге инвестиция тарту жоспарланыпты. Нәтижесінде 300 жаңа жұмыс орны ашылып, жас мамандар үшін мүмкіндік алаңына айналады екен.

Форумда  өзге де бірқатар жұмысшы мамандар мен еңбек адамдары өз ойларын ортаға салды. Әрине, жұмысшы маман десе бірінші кезекте ойымызға ер азаматтардың келері анық. Дегенмен жұмысшы мамандықтарын дәріптеп жүрген нәзік жандылар да аз емес. Мәселен, «Т.И.Батуров атындағы Жамбыл ГРЭС-і» акционерлік қоғамының референт-аудармашысы Ұлдана Тоғанбаеваның айтуынша, аталған кәсіпорында 600 адамнан астам маман еңбек етсе, оның 20 пайызын әйелдер құрайды екен.

– Әйелдер қауымы біздің кәсіпорында өндірістік, инженерлік, зертханалық және әкімшілік бағыттарда табысты жұмыс атқарып келеді. Олар өздерінің ұқыптылығы, тәртіпке бейімділігі мен табандылығы арқылы жұмыс сапасын арттырып, ұжымда сенім мен сыйластықтың үлгісін көрсетуде. Бүгінде әйел мамандар тек орындаушы емес, сонымен қатар бөлім басшысы, инженер, технолог ретінде де өздерін мойындатып отыр.

Энергетика саласындағы мұндай үйлесімділік жұмысшы жастар үшін де үлкен мотивация. Себебі жынысына, жасына қарамастан, әрбір жанға тең мүмкіндік берілген ортада кәсіби өсудің, дамудың жолы да ашық болады. Сондықтан біз еңбек ететін әрбір адамды бағалап, олардың жетістігін ортақ мақтаныш деп қабылдаймыз.

Жұмысшы әйел – отбасының тірегі, ұжымның сенімді мүшесі, ел экономикасының қозғаушы күші. Олардың ерен еңбегі біздің кәсіпорынның тұрақты дамуының, жетістіктерге жетуінің берік негізі,– дейді Ұлдана Кенжеғұлқызы.

Шара соңы концерттік бағдарламаға ұласты.

Мұқағали БАЛТАБАЕВ