Жақында Жамбыл инновациялық жоғары колледжі студенттерінің қатысуымен семинар өтіп, осы тақырып кеңінен талқыланды. Іс-шараны «Astana Hub» технопаркінің өңірлік филиалы – «Zhambyl Hub» ұйымдастырды. Жиынды ҚР Бас прокуратурасы басқармасының IT-заңгері Данияр Шадыханов жүргізді. Спикер студенттерге жасанды интеллекттің оқыту процесіндегі рөлін түсіндірді.

– Машиналық оқыту алгоритмдері білім алу процесі мен оқушының қабілеттерін талдай отырып, оңтайлы оқыту әдістерін анықтай алады. Жасанды интеллект үй тапсырмаларын тексеру, тест нәтижелерін бағалау сияқты міндеттерді автоматтандырып, мұғалімдерге маңызды аспектілерге көбірек назар аударуға мүмкіндік береді. Сондай-ақ білім алушыға жеке қолдау көрсетіп, оқу процесін жеңілдететін бағдарлама – тьюторлық жүйенің маңыздылығына тоқталып өткім келеді. Жасанды интеллект технологиялары виртуалды мұғалімдер немесе тьюторлар құру арқылы қосымша білім беру ресурстарын ұсына алады. Сонымен қатар жасанды интеллект білім беру процесінде аналитика мен болжам жасау үшін де қолданылады. Деректерді талдау арқылы оқушылардың үлгеріміндегі заңдылықтарды анықтап, қиындықтарды алдын ала болжап, шешім ұсынуға мүмкіндік береді, – дейді Д.Шадыханов.

Жасанды интеллекттің тағы бір артықшылығы – шығармашылық қабілеттер мен сыни ойлауды дамытуы. Оқу материалдарына қолжетімділікті кеңейтіп, оқушылардың қызығушылығын арттырады. Сонымен қатар онлайн білім беру платформалары мен қосымшалары шалғай аймақтарда немесе мүмкіндігі шектеулі жандар үшін білім алу мүмкіндігін кеңейтеді.

Алайда «Zhambyl Hub» менеджері Нұржан Сағындық жасанды интеллект тек көмекші құрал екенін ұмытпау қажеттігін еске салды.

– Кейбіреулер жасанды интеллект мұғалімді алмастырады деп ойлайды. Бірақ білім беруде мұғалімнің тұлғасы мен әлеуметтік өзара әрекеттестіктің маңызы зор. Егер технологияны білікті мамандар әзірлесе, ол білімнің қолжетімділігі мен сапасын арттыруға көмектесе алады, – дейді Н.Сағындық.

Білім алу мүмкіндіктері тұрғысынан да жасанды интеллекттің болашағы зор. Мысалы, жасанды интеллект алгоритмдері студенттің деңгейін анықтап, жекелендірілген оқу жоспарын жасай алады. Бұл тәсіл «Duolingo» секілді тіл үйрету қосымшаларында кеңінен қолданылады. Осылайша кездесуде білімгерлерге жасанды интеллекттің артықшылығы жайлы егжей-тегжейлі айтылды.

Ақтоты ЖАҢАБАЙ