Қазақстан Республикасының Денсаулық сақтау министрлігінің Салидат Қайырбекова атындағы ұлттық ғылыми денсаулық сақтауды дамыту орталығы базасында медициналық ұйымдардың өкілдерін медициналық техниканы тиімді жоспарлау мен сатып алу негіздеріне оқыту өткізілді. Оқытуға еліміздің 9 өңірінен барлығы 25 адам қатысты. Бүгінгі таңда денсаулық сақтаудағы негізгі бағыттардың бірі – медициналық мекемелерді заманауи медициналық жабдықтармен жаб­дықтау. Бір айдың ішінде тыңдаушыларға республи­каның медициналық техника айналысы саласындағы нормативтік, реттеуші базасы және жүргізіліп жатқан орталықтандыру шеңберінде сатып алуды басқару, сатып алуды жоспарлау, заманауи медициналық техниканың түрлері бойынша ұсыныстарды талдау, шешімдер қабылдау үшін менеджменттің заманауи құралдарын пайдалану, технологияны бағалау және басқалар бойынша толық ақпарат берілді. Оқытуды Салидат Қайырбекова атындағы ұлттық ғылыми денсаулық сақтауды да­мыту орталығының, ҚР Денсаулық сақтау министрлігінің, Дәрілік заттар мен медициналық бұйымдарды сараптау ұлттық орталығының, ҚР Президенті Іс Басқармасының Медициналық орталығы ауруханасының, «СҚ-Фармация» ЖШС және «Turar Healthcare» КЕ АҚ жоғары білікті сарапшы-практиктері жүргізді. Сондай-ақ оқу шеңберінде тыңдаушылар Астананың бірқатар жетекші медициналық ұйымына барды. Атап айтқанда, Қазақстан Рес­пуб­ликасы Президенті Іс Басқармасының Меди­циналық орталығы ауруханасының, «University Medical Center» корпоративтік қорының республикалық диагностикалық орталығының қызметімен танысты. Сапар барысында мамандар пайдаланатын жаңа технологиялармен және озық жабдықтармен, сондай-ақ медициналық техниканы сатып алуға және қызмет көрсетуге жауапты қызметтердің жұмысын ұйымдастырумен танысуға мүмкіндік туды. Осы медициналық мекемелердің өкілдері қо­нақ­тармен соңғы медициналық техниканы пайдалана отырып пациенттерді емдеу және қолда бар жабдықтарды көрсету тәжірибелерімен бөлісті. Айта кету керек, Ұлттық ғылыми денсаулық сақтауды дамыту орталығының келесі оқу курсын қараша айында өткізуді жоспарлап отыр. ҚР Денсаулық сақтау министрлігінің баспасөз қызметі