Жаздыгүні баланы төрт қабырғаға телміртпей, лагерьге жіберіп, қуаныш сыйлаудың өзі бір бақыт. Аптап ыстықта тұмса табиғаттың тұнығына қанып, таза ауада тыныққанға не жетсін?! Биыл жаз бойы 800-ге жуық жеткіншектің демалуына ықпал еткен облысымыздағы «Қазфосфат» жауапкершілігі шектеулі серіктестігіне қарасты «Жұлдыз» балалар сауықтыру лагерінің үшінші маусымы жабылды. Лагерь биыл үш маусым бойы үзіліссіз жұмыс істеді. «Қазфосфат» ЖШС биыл балаларға арналған барлық іс-шараларға 120 миллион теңге, яғни әр балаға 160 мың қаржы бөлген. Ата-анасының қамқорлығынсыз қалған 15 балаға тегін жолдама жоспарланып, 4 бала қамтамасыз етілді. – Көлемі жағынан үлкен, табиғаты көз тартатын «Жұлдыз» лагері ауасы таза, көкорай, әсем жерде орналасқан. Демалып жатқандардың жоғары тобында 40, кіші топтарында 20-30 баладан қамтылған. Бүгінде 7 мен 13 жас аралығында 9 топ бар. Үш маусымға қатысып, үздіксіз демалып жатқандар да жеткілікті. Мұнда демалушылар бес мезгіл дайындалатын ас мәзірінен дәм татып, түрлі ойын-сауық түрлеріне қатысады. Күнделікті кино көреді. Бассейнді де талапқа сай жаңғырттық. Балалардың әр күніне мереке сыйлап, естен кетпес көңілді кештерді ұйымдастыру – біздің басты міндетіміз, – деді лагерь директоры Қарлыға Қанапина. Мұнда өзара топ арасындағы байқаулар, би алаңы, сондай-ақ «Алло, мы ищем таланты», «Мисс, мистер – «Жұлдыз» және басқа да түрлі батл, конкурс, флешмоб, пати түрлері ұйымдастырылып, жеткіншектердің әр күнін көңілді өткізу мақсатында талантты балалардың өнері сараланады. Лагерьдің үшінші маусымының жабылуына орай өткен салтанатты кеш барысында «Қазфосфат» ЖШС-ның демеушілігімен балаларға сый-сияпат табыс етілді. Түрлі ертегі кейіпкерлерінің қатысуымен қызықты шоу бағдарлама көрсетіліп, ән шырқалып, биге де кезек берілді.

Құралай СЕЙСЕНБЕКҚЫЗЫ