Өмір мәні – өзара сыйластық

Байқауға облыс көлеміндегі әлемді көзімен емес көкірек жанарымен көретін зағип отбасылар және барлық топтағы көз мүгедектігі бар 8-12 жас аралығындағы балалар мен ата-аналары қатысты. Байбосыновтар, Жарылқасыновтар, Әсембектер, Ізбасаровтар отбасылары байқау ережелеріне сәйкес бақ сынасты. Олар «Жанарымдағы сол бір әуен», «Сәнді киім», «Киностан», «Білгенге – маржан...», «Бір жыр оқимын», «Ыстық жанұям» атты кезеңдерде белсенділік танытып, сахнада поэзиялық шығармаларын орындап, өздерінің шеберліктерін, өнерлерін жоғары деңгейде көрсете білді. Қоғамның негізгі мақсаты – адамдарды бақытты ету. Десе де бұл терезесі тең, керегесі кең, берік отбасына байланысты. Байқаудың басында жанына жақын жандардың маңыздылығын ашатын отбасы жайында түсірілген әлеуметтік бейнеролик көрсетілді. Ал өмір сынағына сынбай отбасын сақтап қалу үшін барын аямай жүрген жандар алдында Кенен Әзірбаев атындағы облыстық филармония әншілері өнер көрсетті. Айтар болсақ Алмас Қырғызалиев дәстүрлі ән шырқаса, Балжан Ділдабекова «Құлыншағым» әнін орындады. Отбасы мерекесіне қатысушыларға «Болашақ» мектеп-интернатының оқушылары Салауат Еламан мен Сағындық Айсана қолдау көрсетіп «Әке, ана» әнін орындап, көрермендерге керемет көңіл күй сыйлады. Байқау қорытындысында Байбосыновтар отбасы бірінші орынды олжаласа, екінші орынды Жарылқасыновтар отбасы иеленді. Ал үшінші орынның биігінен Ізбасаровтар отбасы көрінді. Өзге жеңімпаздардан қалыспай байқауда мықтылық көрсеткн Әсембектер отбасы ынталандыру марапатына лайық деп танылды. Байқаудың барлық қатысушылары сыйлықтармен және дипломдармен марапатталды.

Гүлзада ҚЫРЫҚБАЕВА, облыстық көзі көрмейтін және әлсіз көретін азаматтар кітапханасының әдіскері