18 жасқа толғаннан кейін азаматтығын ауыстырған балалар Ұлттық қордан аударылған ақшаны ала алмайды

Ұлттық экономика министрі Әлібек Қуантыров Ұлттық қордан бала шотына ақша аудару механизмі әзірленгенін, Қаржы министрлігі оның ережелерін дайындап жатқанын айтты. «Жүйеде болған 18 жасқа дейінгі балаларға жылдық қорытынды бойынша тиісті инвестициялық кірістің 50 пайызы түседі. Осы 50 пайыз әр балаға үлестіріледі. Жалпы 6,5 млн бала 18 жасқа толғанша осы жүйеде болады. Тек бір жылдың кірісін ғана қарамаймыз. Біз 18 жылдағы орташа кірісті аламыз. Себебі, 18 жылдың ішіндегі әр кезеңде кіріс оң болуы керек», - деді ол. Сондай-ақ бала 18-ге толған соң азаматтығын ауыстырса, ол бұл қаражатты ала алмайды.

Оның айтуынша, 18 жасқа толған бала шотындағы ақшаны алғанда салық салынбайды. Механизм дайын. Қаржы министрлігі ережелерін дайындап жатыр.